Verrassings in die Big Bash T20- krieketreeks
Daar was verlede week heelwat verrassings in die tweede ronde van die Standard Bank Big Bash T20-reeks, onder andere die verdedigende kampioen, Hungry Lions, wat soos verlede week, weer vasgeval het.
Hungry Lions, het teen 'n begeesterde Legends met slegs ses lopies aan die einde van hul kolfbeurt verloor.
In die wedstryd tussen Champs en Firestones was dit 'n naelbytaffêre.
Alhoewel Champs se toporde aanvanklik gewankel het met 44 vir die verlies van sewe paaltjies, het die oorblywende stertkantkolwers hul kant deeglik gebring en 'n addisionele 42 lopies op die telbord geplaas.
In Firestones se jaagtog van 87 lopies het Champs gereeld paaltjies ingeoes, maar was skuldig aan te veel los balle wat hul teenstanders na die grens toe gejaag het. Firestones wen uiteindelik met twee paaltjies.
Pro Stars het op sy beurt die Underdogs 'n krieketles geleer en 'n allemintige 110 lopies in hul toegelate 20 boulbeurte opgestapel. Dit was 'n vergeetbare dag vir die Underdogs wat in antwoord, slegs 'n skandelike 10 lopies bymekaar kon skraap.
In 'n aksiebelaaide wedstryd teen die Team Players het Oukas Sunrisers 95 lopies opgestapel in hul kolfbeurt. Team Players is met vyf boulbeurte (30 balle) oor en
slegs vyf lopies kort van die teiken, almal uitgeboul.
Hunters was in hul wedstryd teen Tornado's goed op pad na 'n oorwinning toe Hunters soos dominoes eenvoudig inmekaar getuimel het. Die manne in oranje het 'n beskeie teiken van 54 lopies gejaag van 120 balle, maar is uiteindelik almal uitgeboender vir 45 lopies.
Met hierdie oorwinning beklee Tornado's tesame met Legends, Pro Stars en Firestones nou die boonste posisie op die punteleer met agt punte na twee wedstryde.