ICOSA-skorsings onwettig
Die skorsing van Jeffrey Donson, president van Icosa en burgemeester van Kannaland-munisipaliteit en sy seun Vlancio Donson, 'n lid van die ICOSAnasionale uitvoerende komitee (NUK) en onderburgemeester van die Oudtshoorn-munisipaliteit, is deur die NUK as ongeldig verklaar.
Dawid Kamfer, Icosa se provinsiale voorsitter, het dié twee Icosa-lede verlede week geskors.
Kamfer, het in 'n verklaring aangekondig dat Jeffrey Donson weens growwe wangedrag en die feit dat sy reputasie die party oneer bring, geskors is. Luidens die verklaring het Jeffery, sedert sy verkiesing as president, geen waarde toegevoeg tot die party nie. Vlancio is ook geskors omdat hy die party in oneer gebring het.
Jeffrey het oor sy skorsing gesê dat Kamfer ongrondwetlik en volgens prosedure verkeerd opgetree het. "Hoe kan ‘n provinsiale voorsitter lede van die NUK skors? Ons het die meerderheid in die NUK en die provinsiale uitvoerende komitee. In politiek gaan dit oor getalle en niks anders nie." Kamfer het op sy beurt gesê, "Hy is wettiglik verkies tot tussentydse leier deur die meerderheid. Diegene in Riviersonderend verkies is die tussentydse komitee.”
In die jongste persverklaring wat Maandag deur Nadia Blaauw uitgereik, sê Icosa dat die NUK 'n vergadering in Oudtshoorn gehou het en dat daar bevind is dat die skorsing onwettig was.
"Die provinsiale uitvoerende komitee het ‘n mosie van wantroue in Dawid Kamfer, sowel Benjamin Marsala, die provinsiale ondervoorsitter, ingestel waar hulle dan ook uit hul posisies verwyder is. Dit is na die NUK verwys en aanvaar. Die nuwe provinsiale voorsitter is nou Bianca Booysen en Gert Uithaler die provinsiale ondervoorsitter.” Verder beklemtoon Icosa, dat die verkiesing van Kamfer as interim president van Icosa en Marsala as interim provinsiale voorsitter gedoen is om verdeeldheid te saai en nie deur die NUK erken word nie.
Die NUK in Oudtshoorn het ook die resolusie aanvaar dat die volgende nasionale kongres op 8 en 9 Desember in Ladismith gehou sal word.