Blossoms gereed om water te lewer
Die Blossoms-noodwaterprojek, wat water aan Oudtshoorn en omliggende gebiede sal verskaf, is gereed om in werking gestel te word, behalwe vir een kinkel in die kabel: Eskom.
Die pyplyn, wat in sy eerste fase drie boorgate in werking stel, is Woensdag 4 Oktober amptelik bekendgestel tydens 'n geleentheid by Chandelier Wildsplaas, sowat 9 km buite Oudtshoorn op pad na George.
Amptenare en raadslede van die Oudtshoorn-munisipaliteit, rolspelers betrokke by die projek, sowel as WesKaapse minister van plaaslike regering, Anton Bredell, was teenwoordig. Almal is na 'n voorlegging van Chris Swart, senior bestuurder van water en sanitasie in Oudtshoorn, op 'n toer van die pyplyn, pompstasie en sommige van die boorgate geneem.
Die projek, wat na lang afwagting reeds in Augustus voltooi is, beoog om watertoeganklikheid in die omgewing te verbeter.
Bredell het in sy spreekbeurt gesê dat projekte soos hierdie bydra om die kritieke belangrikheid daarvan om betroubare en volhoubare toegang tot waterbronne te verseker en te beskerm aanspreek. "Om 'n waardige lewe vir mense te belowe, moet jy vir hulle water gee," het hy gesê.
Hy het die Groter Oudtshoornmunisipaliteit en departement van water en sanitasie (DWS) geprys vir hul toewyding tot die ontwikkeling en implementering van die projek.
Swart, in sy kapasiteit as senior bestuurder van water en sanitasie in Oudtshoorn, het oor die projek uitgebrei.
Hy het gesê die hart van hierdie projek lê in 'n pyplyn van 22 km wat by die hoofboorgat op die Kleinfonteinplaas in die Blossomsomgewing begin vanwaar dit oor 1,5 km na 'n pompstasie en reservoir gepomp word.
Water word volgens Swart uit die sekondêre boorgate ook na die pompstasie en reservoir gepomp. Vanaf hierdie reservoir word water teen 48 liter per sekonde gepomp na die hoofreservoir 2,5 km verder op die plaas, Chandelier. Vanuit hierdie reservoir sal water langs 'n pyplyn van 17 km graviteer, en die Olifantsrivier oorsteek via die ou padbrug net buite Oudtshoorn. Daar word die water verdeel met van die toevoer wat na die Landelike Waterskema gaan en die res na die Oos-reservoir naby die korrektiewe dienste-terrein om die watertoevoer na die dorp te vergroot.
Hierdie fase van die projek beloop tans 'n koste van byna R100 miljoen.
Die laaste struikelblok, een van vele wat tydens die projek ondervind is, is Eskom.
Luidens 'n verklaring van die munisipaliteit moet daar nog kragkabels geïnstalleer word, veral by die pompstasie. "Terwyl ons op die drumpel van transformasie staan, is daar nog 'n laaste belangrike stukkie van die legkaart: die installering van kraglyne deur Eskom. Sodra dit afgehandel is, sal die Blossoms-waterprojek ten volle operasioneel wees, wat vars hoop en lewenskrag na ons gemeenskap en gebiede so ver as Calitzdorp sal bring," lui die verklaring.
Volgens die munisipaliteit lyk die toekoms vir Oudtshoorn en sy landelike gemeenskappe helderder met die voltooide
Blossoms-waterprojek.
Die projek beloof om 4 150 kl water aan
Oudtshoorn en omliggende landelike gebiede te verskaf.