Agt kerke vier 56ste UCCSA-Dag
UCCSA-Dag is Sondag deur gemeentelede van agt United Congregational Churches (Sone 2 in die Outeniquastreek) in die Dysselsdorp United Congregational Church gevier. Die oggend se verrigtinge het begin met ‘n optog gelei deur ‘n gesamentlike brigadeorkes.
Dit was die 56ste herdenking van die stigting van die United Congregational Churches of Southern Africa (UCCSA) op 3 Oktober 1967 in Durban.
Die diens is gelei deur eerw. Johannes Muggels van die Oudtshoorn United
Congregational Church, terwyl eerw. Assur Waarts van Dysselsdorp die boodskap na aanleiding van Romeine 8 en Johannes 16 gebring het.
Kerse is tydens die diens aangesteek vir die sewe lande in Afrika wat aan UCCSA behoort naamlik Suid-Afrika, Botswana, Mosambiek, Namibië, Zimbabwe, Angola en Malawi asook vir die agt kerke in Sone 2 naamlik Calitzdorp, Oudtshoorn, Weyers Memorial Bridgton, Toekomsrus, Bongolethu, Dysselsdorp en Henry J Blazey Memorial De Rust.
Die diens is opgehelder deur die koorsang van die Sone 2-koor en ‘n gesamentlike brigade-orkes.
Interessante feite
UCCSA is op 3 Oktober 1967 in Durban gestig toe die London Missionary Society, die Congregational Union of South Africa, die American Board Mission en die Bantu Congregational Church saamgesmelt het.
Die eerste Sondag in Oktober is toe bepaal as UCCSA-Dag met die hoofdoel om fees te vier en te reflekteer op die reis tot dusver as ‘n UCCSA-familie.
Die oudste Congregational Church in die Outeniqua-streek is Pacaltsdorp, gevolg deur Matjiesrivier, Dysselsdorp en Oudtshoorn.
In Sone 1 van die Outeniqua-streek is UCCSA-dag Sondag in die Groot-Brakrivier kerk gevier.