Vlakkierugby sorg vir eie wêreldbekertoernooi in Ladismith
KANNALAND - "As jy alkohol en dwelms misbruik of in misdaad betrokke is, kan jy nie ‘n sportman of sportvrou wees nie." Dit is die boodskap agter Ladismithpolisiestasie se gewilde ‘VlakkierugbyWêreldbekertoernooi’ wat tans tussen die vier dorpe in Kannaland naamlik Ladismith, Van Wyksdorp, Zoar en Calitzdorp gespeel word.
Die eerste ronde van die kompetisie is verlede Woensdag, 4 Oktober, in Zoar by ‘Die Vlak’ gespeel.
Adjunk-offisier Jannie Cederas verduidelik: "Ons is hier om die jeug bewus te maak van die gevare van dwelms en alkohol. Die sportteen-misdaadprogram fokus op dissipline en respek. Dit moedig jongmense aan om op hul drome te fokus. Dit terwyl hulle lewensvaardighede speel-speel aanleer."
Elke wedstryd is bygewoon deur groot getalle jongmense en hul ouers onder die toesighoudende oog van die manne in blou wat ook in sportdrag geklee was.
Deelnemers was dit eens dat terwyl almal tans in die gees van Wêreldbekerrugby is, is die gees ook hier op die plattelandse dorpies hoog. "Ons dra elke Vrydag ons Bok-klere in Bok-Vrydag," het Cederas gesê.
Sersant Henry Moses, wat op Zoar gestasioneer is het op sy beurt gesê dat sport die jeug weerbaar en geestelik sterk maak wat ook die algehele doel van die sportprogram is.
Die vier spanne wat hier meegeding het, het elk ‘n kontantprys ontvang. Daar is ook lekkernye aan sowat 100 kinders uitgedeel. Die uitspeel en eindstryd word geskeduleer vir vroeg in Desember op Towerkoppark. Tot dan is daar elke week uitklopwedstryde.
‘n Jong speler, Peter, het te kenne gegee: "Ek wil ook eendag ‘n polisieman wees. Ek wil sport speel in die polisie. Misdaad verniel, sport bou op."