Julies wil De Rust se jeug weer laat droom
Werner Julies gaan Saterdag 7 Oktober tydens die Optimum Meiringspoort (21,1 km en 12,5 km) - wedloop probeer regkry wat bitter min, waarskynlik geen, De Ruster nog reggekry het nie; en dit is om 'n goue medalje in 'n Optimum Meiringspoort (21,1 km en 12,5 km) - wedloop te wen.
Volgens Julies is daar ’n goeie rede waarom hy graag wil wen:
"Ek wil bittergraag aan De Rust se jongmense wys dat drome nog waar kan word. Dwelm- en drankmisbruik is 'n groot probleem onder die dorp se jeug. Ek dink dit gebeur omdat jongmense opgee op die lewe en dit is jammer. As dit nie vir my passie vir sport was nie, kon my lewe baie anders uitgedraai het. Sport het my geleer vasbyt en om gedissiplineerd te wees."
Julies vertel verder dat hy aanvanklik krieket en vlugbal vir Hoërskool De Rust gespeel het voordat hy na skool vir De Rust
United se sokkerspan uitgedraf het.
"Die hardloopgogga het my maar verlede jaar gebyt, uit blote nuuskierigheid. Ek het terloops gehoor van die De Rust "Trail Run" en omdat ek hou van uitdagings het ek toe maar besluit om in te skryf. Tot my verbasing het ek vierde in die 9,5 km-wedloop geëindig. Hierdie uitslag het my lewe verander. Ek het diep binne geweet ek kan beter doen as ek harder oefen. My grootste motivering elke dag is die wil om môre beter te wees as wat ek vandag is," sê Julies.
Met so 'n gesindheid is dit geen verrassing dat Julies oor die afgelope paar maande 'n hele paar keer op die trappies van verskeie podiums gestaan het nie. Een van sy eerste groot deurbrake was toe hy verlede jaar derde in die Optimum Meiringspoort se 12,5km-wedloop geëindig het.
Wat Julies se vertonings in wedlope merkwaardig maak is dat hy as amateur, beroepsatlete die stryd aansê. Dit is nie altyd maklik nie. Meeste van die atlete wat in die kleure van die groot beroepsklubs deelneem, se inskrywingsgelde en vervoerkoste na wedlope word geborg. Baie van hulle beskik ook oor 'n skoenborg en kry ook vitamienaanvullings tesame met afrigters wat die atlete bystaan. Ten spyte daarvan dat Julies gematrikuleer het, sukkel Julies tans om werk te kry. Die kere wat hy wel werk, is dit as 'n skoonmaker.
"Ek kla nie. Die lewe is vol uitdagings en as jy dit nie met 100% oorgawe aandurf nie, gaan jy altyd misluk. Dit gaan partykeer maar moeilik om by wedlope uit te kom. Maar daar is mense wat goed is vir my. Ek is ongelooflike dank aan Pieter en Elbe Schoeman verskuldig. Hulle gaan uit hul pad om my te help. Hulle het al soveel keer vir my nuwe drafskoene gekoop. Ek is nie 'n groot voorstaander van vitamienaanvullings nie. 'n Mens moet gebruik wat die natuur vir jou gee. Daarom eet ek baie vrugte. Dit gee my energie en hou my gesond."
Julies glo vas dat hy die Optimum Meiringspoort 12,5 km-wedloop kan wen.
"Dit is my droom. As my bene dit toelaat, gaan ek soos die wind hardloop. En as ek wen, hoop ek dit inspireer jongmense om weer te begin droom."