Samwu-lede op ‘spesiale verlof’ geplaas
Ses vakbondverteenwoordigers van Samwu (Suid-Afrikaanse Munisipale Werkersunie), is onlangs op 'spesiale verlof' geplaas na aanleiding van hul aksie tydens 'n raadsvergadering op 22 September waar hulle die raadsaal binnegegaan het en geweier het dat raadslede die saal verlaat voordat hulle 'n memorandum kon voorlees.
Oudtshoorn Courant het in die uitgawe van 29 September berig dat 'n groep Samwulede die vergadering binnegekom het en dit geblyk het dat hulle raadslede keer om die raadsaal te verlaat. Samwu-lede het voor die deur gestaan en onder meer in ’n woordewisseling met raadslede betrokke geraak.
Die unie se sekretaris Amy Sylvester het gesê die raadsvergadering was die mees gepaste plek om 'n memorandum te oorhandig.
"Ons is siek en sat daarvoor om stil te bly oor alles. Ons moes dit in die raadsvergadering doen sodat die hele raad kan sien wat eintlik aangaan," het sy toe gesê.
Die Samwu-memorandum het vele punte bevat, onder meer kwessies oor beweerde onwettige aanstellings, inmenging met administrasie en die toestand van munisipale geboue en beroepsgesondheid en -veiligheid.
In 'n verklaring op daardie insident, uitgereik deur munisipale woordvoerder Aurelia Mle, is gesê dat Samwu die raadsvergadering "onaangekondig" binnegegaan het met die mikpunt daarop om hul memorandum aan alle raadslede voor te lees en aan die burgemeester te oorhandig.
"Die ontwrigtende optrede het ingesluit om die deure van die raadsaal te blokkeer en enigiemand te verhoed om te vertrek totdat hulle 'n spreekbeurt gegun is," het die verklaring gelui.