Hooggeregshofbevel teen swart sak-aksie
'n Hooggeregshofsaak wat deur die Oudtshoorn-munisipaliteit aanhangig gemaak is teen Arno Greyling, organiseerder van onlangse swart sak-aksie in Oudtshoorn - is Vrydag 13 Oktober in Kaapstad afgehandel.
Greyling het sedert Augustus twee swart sak-aksies op die oop stuk grond oorkant die Oudtshoorn-munisipaliteit se geboue in Voortrekkerweg gereël, wat geverg het dat inwoners hul vullissakke daar kom plaas in protes teen "buitensporige hoë" munisipale tariewe, soos Greyling dit beskryf het.
Met sy mees onlangse aksie het hy homself op 6 Oktober aan die, Ek is Oudtshoorn-teken, op dieselfde grasperk vasgeketting.
Uitspraak
Luidens 'n verklaring van die munisipaliteit, uitgereik deur woordvoerder Aurelia Mle, het die uitspraak die volgende punte tot betrekking:
Die respondent word verbied om enige afval te stort, op te gaar, te plaas, te deponeer of los, soos omskryf in Artikel 1 van die Verordening, of veroorsaak dat afval gestort, opgegaar, geplaas, gedeponeer of gelaat word op enige plek wat in Artikels 16(1)(b)(i) tot (iv) van die Verordening geïdentifiseer word en geleë binne die aansoeker se munisipale grense.
Gedrag aan die kant van die respondent, en veral in die konteks van die woord “veroorsaak” in die vorige punt, sal die volgende insluit: persoonlike interaksies tussen die respondent en enige ander lede van die publiek; skriftelike korrespondensie, hetsy in hardekopie vorm of in elektroniese vorm; telefoniese en ander vorme van oudiokommunikasie; plasings op enige vorm van sosiale media-platforms; en interaksies met enige koerante, hetsy nasionaal, plaaslik of elektronies.
Volgens die verklaring moet elke party sy eie koste aangaande die hofsaak betaal.
Munisipaliteit
In die munisipale verklaring het Walter Hendricks, munisipale bestuurder van die Groter Oudtshoorn, die munisipaliteit se standpunt uitgespreek.
"Die munisipaliteit verwelkom die hof se uitspraak dat die swart sakke-voorval onwettig was. Die munisipaliteit kan nie die verontagsaming van wette toelaat nie. Dit behoort 'n duidelike boodskap aan alle oortreders te stuur. Dit is nie oor die individu nie, maar die oortreding van die wet. Die organiseerder van die betogings is gewaarsku, maar hy het voortgegaan om die munisipaliteit uit te daag om hom te keer, en die uitspraak het bewys sy optrede was onwettig.”
Hendricks het luidens die verklaring verder beklemtoon dat die burgemeester, Chris Macpherson, dit duidelik gemaak het dat dit die reg van enige individu of groep is om te betoog solank hulle die regte prosedures volg en die land se wette respekteer.
"Ek het kennis geneem van die bekommernisse van ons belastingbetalers en versoek dat ons saamwerk om die begroting te struktureer op 'n manier wat ons belastingbetalers bevoordeel en terselfdertyd effektiewe dienslewering verseker," het Macpherson gesê.
Greyling
Greyling het op sy beurt aan Oudtshoorn Courant gesê dat sy aksies blykbaar as krimineel verklaar sou word, maar dat hierdie klag teruggetrek is voor die hofverrigtinge voortgesit is. "Dit het nie geslaag nie. Hulle het ook gevra dat ek stilgemaak word in terme van sosiale interaksie met die res van die lede van die drukgroep, maar dit het ook nie geslaag nie. Hulle het ook gevra dat daar 'n kostebevel teen my uitgereik moet word, en dit het ook nie geslaag nie."
Volgens Greyling is daar wel 'n interdik teen hom bekom dat hy nie meer swart sakke mag neersit of veroorsaak dat swart sakke neergesit word nie. "Dis 'n groot oorwinning vir ons, want elkeen dra nou sy eie kostes. Dit het ons derduisende rande gekos. Dit was 'n vreemde gedrag van die munisipaliteit," het hy gesê.
'n Groot groep Oudtshoorniete, insluitend sakelui en alledaagse inwoners, het meer as R45 000 ingesamel om Greyling met sy hofsaak te help.