Lottering in hof
‘n Voormalige munisipale bestuurder van Oudtshoorn, Ronnie Lottering, wat nou in Wellington woon, en teregstaan op tien aanklagte van bedrog ten opsigte van die oortreding van die Wet op Munisipale Finansiële Bestuur, het verlede Donderdag vlugtig in die Oudtshoorn-streekhof verskyn.
Lottering is in 2016 uit sy pos geskors hangende 'n interne ondersoek. Hy het vir bykans twee jaar voordat Oudtshoorn onder administrasie geplaas is, waargeneem as munisipale bestuurder. Hy het kort na sy skorsing bedank.
Oudtshoorn Courant het in 2016 berig dat hy een van drie senior amptenare was wat onder die wolk van hangende ondersoeke bedank het. Die ondersoeke het verband gehou met bewerings van wanbestuur wat voor die administrasietydperk plaasgevind het.
Die staatsaanklaer, Willem Vister, het die hof meegedeel dat die ondersoek voltooi is en die saak teen Lottering vir pleit en verhoor uitgestel kan word.
Lottering het volgens die klagstaat tussen Mei 2013 en April 2015 op onwettige wyse vir Imvusa Trading, Tremenders en Ihlati Communications as diensverskaffers vir die munisipaliteit aangestel aan wie miljoene rande betaal is.
Lottering het die hof Donderdag meegedeel dat hy om regshulp aansoek wil doen en die saak is deur landdros Elsie Schoeman vir ‘n
streekhofdatum tot 2 November uitgestel.
Die beskuldigde is op waarskuwing vrygelaat.
Die burgemeester van die Oudtshoornmunisipaliteit, Chris Macpherson, het gesê: "Ek is verheug dat die regsproses nou begin na jare lange ondersoeke ten opsigte van ongeruimdhede, bedrog en korrupsie wat voor 2016 aan die orde van die dag was. Die hooggeregshof het reeds in Oktober 2022 beslis dat Lottering aanspreeklik is vir R7,88 miljoen teenoor die munisipaliteit vir sy aandeel in die oortreding van munisipale wetgewing. Ek vertrou op die regsproses en glo dat die skuldiges aan die pen sal ry. Hierdie moet ook ‘n duidelike boodskap wees om amptenare te waarsku dat die wiel van die gereg wel stadig draai, maar dat daar vervolging sal plaasvind."