Gesprekke oor bewusmaking van borskanker
Pienk is nie net 'n mooi kleur nie, maar ook die kleur wat gebruik word om bewustheid oor borsgesondheid in Oktober te skep. Gesondheidsfasiliteite regoor die streek is besig met geleenthede en gesprekke met betrekking tot borskanker om bewusmaking onder gemeenskappe te kweek.
Volgens Nadia Ferreira van die Wes-Kaapse departement van gesondheid en hoofkommunikasiebeampte van die Tuinroete en Sentraal Karoo-distrikte, het afgetrede verpleegster Mercia Human, by wie borskanker op 12 Desember 2011 gediagnoseer is, met 79 vroue gepraat tydens 'n borskankerbewusmakingsgeleentheid wat deur gesondheidspersoneel by die Oudtshoorn Feather Factory gehou is.
Mercia het haar storie gedeel met die hoop om behoeftiges op te hef.
"Ek sal nooit die dag vergeet toe ek met borskanker gediagnoseer is nie," onthou sy.
"Dit was 12 Desember 2011. Ek is meegedeel dat ek stadium drie aggressiewe borskanker het en dit het na my limfkliere versprei. Ek onthou dat ek heeltemal oorweldig gevoel het. Maar my geloof in God en die liefde van my familie en ons kerkgemeenskap het my deur die moeilikste tyd van my lewe gesien.”
Volgens die Kankervereniging van Suid-Afrika loop ongeveer 19,4 miljoen vroue van 15 jaar en ouer die risiko om met borskanker gediagnoseer te word, die kanker wat Suid-Afrikaanse vroue die meeste affekteer.
Op 4 Januarie 2012 het Mercia ’n mastektomie ondergaan om te keer dat die kanker versprei. Sy het vir chemoterapie en bestralingsterapie gegaan.
Tien jaar ná haar diagnose is sy in remissie en dankbaar vir elke dag wat sy saam met haar familie, twee dogters en vier kleinkinders kan spandeer.
Ferreira sê dit word aanbeveel dat vroue elke maand hul borste nagaan.
Neem kennis van die volgende veranderinge:
Verrimpeling van die vel van die bors
'n Knop in die bors of oksel 'n Verandering in die vel rondom die tepel of tepelafskeiding
Kuiltjies van die tepel of terugtrekking van die tepel
'n Ongewone toename in die grootte van een bors
Een bors ongewoon laer as die ander; tepels op verskillende vlakke 'n Vergroting van die kliere 'n Ongewone swelling in die oksel
Besoek jou plaaslike huisdokter of jou kliniek as jy enige tekens of simptome van borskanker toon.