Meiringspoort lok 1 000de
Die 29ste Optimum Meiringspoorthalfmarathon het verlede Saterdag sy voorafgaande reputasie gestand gedoen, en altesaam 3 354 inskrywings is vanjaar ontvang. Verrigtinge in De Rust het vroegdag reeds begin met duisende opgewonde atlete wat vanaf die dorp na Meiringspoort per vragmotor vervoer is, waar die beginpunt vir die 12,5 km ook was.
Die 21,1 km het nog 'n ent verder weg begin met beide afstande wat by die NG Kerk in De Rust geëindig het.
Oudtshoorn Courant, onder die vaandel van Group Editors, het ook vanjaar sy eie waterpunt behartig. Oudtshoornburgemeester Chris Macpherson het die atlete laat wegspring.
Die koel weersomstandighede was perfek vir drafweer en dit was dus geen verrassing toe die De Ruster, Werner Julies in die eerste wedloop van die dag, die 12,5 km, die pas van die begin af dik aangemaak het nie.
Julies het voor die wedloop sy aspirasies vir vanjaar se Meiringspoort-halfmarathon duidelik gemaak om hierdie wedloop te wen, 'n droom wat nie te vergesog geklink het nie in ag genome die fikse en gedugte teenstander wat hy is.
Volgens Julies het sy teenstanders
Rico van der Horst en die uiteindelike wenner, Bernado Fredericks hom eers met 5 km oor ingehaal waarna hy algeheel derde geëindig het.
"Ek is baie tevrede met wat ek vermag het en ek glo dat ek elke jaar net sterker sal word. Op hierdie stadium is my grootste doelwit om aan die Comrades in 2026 deel te neem en al hierdie wedlope vorm deel van daardie voorbereiding. De Rust is maar 'n klein dorpie en ek wil graag 'n rolmodel vir almal hier rond wees om te bewys dat jy kan presteer as jy gedissiplineerd is. Dan wil ek ook baie dankie sê aan my borge wat insluit al die omliggende plaasboere wat my droom ondersteun. Ek sukkel tans om 'n vaste werk te kry en sonder hulle sou die uitleef van my droom nie moontlik gewees het nie."
In die meer veeleisende 21,1 km het die Georgiet, Selwyn Matthews, hakskene gewys vir die res van die hoopvolle atlete deur 'n volle vier minute voor sy naaste teenstander te eindig. Sy tyd was 'n skitterende 1 uur, vier minute en 38 sekondes.
"Ek het vooraf geweet dat Francois Maquassa 'n moeilike atleet gaan wees om te klop, maar gelukkig het ek in die laaste drie kilometers genoeg in die tenk oorgehad om afstand tussen ons te sit. Daar is nog heelwat plek vir verbetering in die uitvoering van my planne in die wedloop, so ek sal nie sê dat dit 'n flawless race was nie; maar vir nou sal ek hierdie wen vat en vier," het Matthews direk na die wedloop gesê.
Die vrouewenner van die 21,5 km, Leilanie Scheffer van Rustenburg was dit eens dat sy met drie kilometers oor besef het dat sy die eerste vrou oor die wedloop kan wees en vandaar af het sy nie weer teruggekyk nie. Die feit dat sy ook die eerste veteraan vir vroue bo die ouderdom van 40 jaar was het die kersie op die koek gesit.
Vanjaar se Optimum Meiringspoorthalfmarathon het oudergewoonte twee dae voor die wedloop weggespring met 'n borgeaand afgesluit en met 'n heerlike braai en oopkroeg.
Gedurende die verrigtinge het die TikToksensasie, Tino die verhoor vermaak met sy diep bariton-stem en flinke kitaarspel. Dit was veral sy liedjie, Katriena Malherbe wat die voete laat jeuk het en hy het welverdiend na sy laaste liedjie 'n staande applous van die gehoor gekry.
Die wenners van die onderskeie kategorieë is as volg: Ope mans (21,1km) Selwyn Matthews (1:04:38) Francois Maquassa (1:08:18)
Keegan Cooke (1:09:59)
Ope Dames
Leilanie Scheffer (1:18:23) Melissa van Rensburg (1:19:56) Kaitlyn Wolff (1:22:36) 70+ mans
Trevor Parry (1:44:54) Chales Beaurain (1:57:53)
Johann Kotze (2:13:00)
70+ dames
Lida Olivier (2:23:48) Rina Machado (2:19:13) Heather Kennedy (2:36:38) Ope mans 12,5km Bernardo Fredericks (39:11) Rico van der Horst (40:10)
Werner Julies (41:05)
Ope dames 12,5km
Louis Dippenaar (50:23) Jandri Snyders (52:52) Louise Aucamp (55:35)
Mans 70-79 jaar oud
Peter Jakoby (1:9:46)
Koos Hanekom ( 1:22:35) Norman Newcombe ( 1:23:44)
Vroue 70-79 jaar oud
Michelle Whittington (1:15:08 Diana Venter (1:28:01)
Jane Mouton (1:43:52)
Die oudste deelnemer was Beatrix de Villiers (81) en sy het die 12,5 km in 'n tyd van 1 uur en 57 minute voltooi wat dus beteken daar is dus geen verskoning vir Jan Rap en sy maat om ook volgende jaar aan tree nie!