Moontlike ontwikkeling van bates bespreek
'n Spesiale raadsvergadering van die Groter Oudtshoorn munisipale raad, wat Donderdag 7 Desember eers vreedsaam begin het, het later ontaard in 'n oor-enweer stryery tussen partye oor onder meer die bewoording van voorstelle op die punt van die moontlike ontwikkeling van die Kango-bergoord en Bridgton-chalets.
Burgemeester Chris Macpherson het met aanvang van die vergadering alle raadslede gelukgewens en bedank vir die aandeel wat hulle daarin gehad het om te verseker dat die munisipaliteit vir die eerste keer in 17 jaar 'n skoon oudit vanaf die Ouditeur Generaal ontvang het.
Die groot besprekingspunt van die dag, wat beide die beherende en opposisiepartye ontstel het, was voorstelle rakende die Kango-bergoord en Bridgton-chalets se moontlike ontwikkeling wat deur die munisipale bestuurder, Walter Hendricks, gemaak is.
Onder hierdie voorstelle was dat die raad 'n voorlopige besluit neem om die voorstel, om in 'n "gesamentlike ondernemingsooreenkoms" met 'n ontwikkelingsmaatskappy te tree, te aanvaar of te verwerp. Hierdie maatskappy wil ondersoek instel of die ontwikkeling van die bates vatbaar sal wees.
Die opposisiepartye het onmiddellik kapsie hierteen gemaak.
Die tweede voorstel was dat, indien die raad die voorstel aanvaar, die relevante "supply chain management"-proses gevolg word, gelei deur die finansiële departement. Weereens is kapsie gemaak.
Raadslede Colan Sylvester (OGI), Zoe TyaTya (ANC) en Sonia Bentley (Good) was teen die voorstelle gekant. Sylvester het aangevoer dat die ontwikkeling van munisipale eiendom eers deur 'n tenderproses moet gaan. Dié voorstel is deur TyaTya en Bentley ondersteun. Al drie partye was dit eens dat so 'n besluit om 'n voorstel te aanvaar sonder die nodige prosesse onwettig sou wees.
Macpherson het hierop geantwoord dat daar reeds drie tenderprosesse ondergaan is met geen voorstelle wat ingedien is nie. Hy het raadslede daarop gewys dat die bewoording van die voorstel klem daarop lê dat dit 'n voorlopige ooreenkoms sal wees en dat die ontwikkelingsmaatskappy self die munisipaliteit genader het, met geen koste aan die munisipaliteit verbonde nie.
Bentley het aangevoer dat die bewoording van die voorstel dus verander moet word.
Na 'n ongewoon lange koukus, geroep deur die opposisie, is daar wysigings aan die voorstelle gemaak.
Volgens die burgemeester se woordvoerder Hannes Visser, was daar slegs oor die Kango-bergoord ‘n raadsbesluit geneem.
"Die ontwikkelaars wat belangstel moet ‘n ondernemingsooreenkoms met die munisipaliteit sluit waarvolgens hulle geleentheid gegun word om hulle eie volhoubaarheids- en impakstudies te doen voordat hulle ‘n formele voorlegging aan die raad doen," het hy gesê.
Volgens hom sal hierdie aanvanklike ooreenkoms geen finansiële implikasies vir die munisipaliteit hê nie, aangesien die ontwikkelaars die studies op hulle eie koste doen.
"Die ooreenkoms is dus slegs ‘n eerste stap om aan die ontwikkelaar geleentheid te gee om hulle 'huiswerk' te doen met die voorbereiding van ‘n volledige voorlegging aan die raad."
Hy het bygevoeg dat daar nog nie ‘n besluit oor die Bridgton-vakansieoord geneem is nie.