Weermaglid in hof na mesdood
Die weermaglid wat van moord op ‘n pa van drie kinders aangekla word, het Dinsdag weer vlugtig, en steeds sonder regsverteenwoordiging, in die Oudtshoornlanddroshof verskyn.
Die 32-jarige Kgametso Tsime het na bewering op Vrydag 29 Desember die 39-jarige Patrick Brocklebank in St. Saviourstraat naby die Indraf
Kafee met ‘n skerp voorwerp gesteek, nadat hulle glo in ‘n woordewisseling was.
Tsime het die hof Dinsdag meegedeel dat hy voortgaan om sy eie regsverteenwoordiger aan te stel en nie van regshulp gebruik wil maak nie.
Die landdros het die saak tot vandag (Donderdag 11 Januarie) uitgestel vir Tsime om te sorg dat sy regsverteenwoordiger teenwoordig is, en op rekord kan kom. Daar sal dan ‘n datum vir ‘n borgaansoek vasgestel kan word.
Heelwat familielede van die oorledene en ‘n groot aantal belangstellendes het Dinsdag se verrigtinge bygewoon.
Die organisasie, Oudtshoorn Community Against Crime (OCAC), het vroeër die oggend ‘n petisie met handtekeninge waarin gevra word dat die verdagte in hegtenis gehou word, aan hooflanddros Ryan van Harte oorhandig.
Intussen het Brocklebank se ma, Amanda Koen, gesê dat die wonde van haar kind se grusame moord steeds baie rou is vir haar en haar familie.
Koen is 'n bekende in Oudtshoorn en was die gemeenskapsmobiliseerder van Kansa.
"Patrick was my vreeslose kind met 'n hart van goud, hy was vir niks en niemand bang in die lewe nie. Hy het gelewe vir sy kinders tot die einde."
Sy beskryf hom verder as 'n harde werker wat voluit gelewe het.
"Hy het almal altyd vermaak met sy grappe en stoutigheid. Hy was van kleins af bitter lief vir sy twee sussies en sy broer en sou enige iets vir sy familie doen. Vir my as sy ma sou hy altyd met sy lewe beskerm. Ek as ma wil net hê geregtigheid moet geskied. My kind het nie verdien om so te sterf nie. Hy was in die bande bedryf vir jare onder sy swaer en suster se vlerk, en was ongelooflik goed in sy werk. Ons as gesin gaan sy menswees mis, sy persoonlikheid was amazing. Hy was opgewonde oor als. Hy was slimmer as n mens, soos my kinders sê. Rus in vrede my kind die wêreld is nie meer maklik nie. Almal wat jou geken het was lief vir jou."
Koen sê hy en sy suster, Gail Steyn, het 'n baie nou band met mekaar gehad en sy wou nooit iets verkeerd hoor van hom nie.
"Patrick was bitter lief vir sy kinders, ma, susters en broer. Hy was 'n harde werker, hulle het hom altyd McGyver genoem. Die laaste tyd was hy so opgewonde as ek sê ek stuur vir jou 'n pakkie. As ek vanaand sy plek kon vat, sweer ek ek sou. Patrick was nie 'n slegte mens nie. Hy wou net gelukkig wees," het sy suster gesê.
Volgens Koen het Brocklebank se broer, AJ, gesê: "Hy was die slimste ou wat ek geken het, so prakties aangelê dat dit eintlik scary was. Ek het emmers vol fond memories saam met hom. Hy het my baie geleer, sekerlik meer as enige iemand anders."
Sunè Rheeder sy jongste suster het op haar beurt gesê: "Pat was altyd daar vir almal. As jy hulp gekort het, het hy gehelp. Sy hande kon alles doen. Hy het absoluut gelewe vir sy kinders en het nooit a dull moment gehad nie! Patrick was 'n fees, en saam met hom het jy altyd gelag. Sy lewe was nie altyd maanskyn en rose nie, maar hy het nooit opgegee nie."
Hy laat sy ma, susters, sy broer, en drie kinders, sowel as die ma van sy kinders agter.