Simon Swigelaar, krieketlegende ter ruste gelê
Hy was ‘n krieketlegende, familieman, mense-mens en skoolhoof soos min. So is die lewenslange erepresident van die Union Stars-krieketklub en SWD-krieket, asook erelid van Krieket Suid-Afrika (KSA), Simon Petrus Swigelaar, alombekend as ‘Espee’ verlede week tydens sy troosdiens en begrafnis in die Weyers Memorial United Congregational Church beskryf.
Swigelaar is op Vrydag 2 Februarie na ‘n kort siekbed op 90-jarige ouderdom oorlede.
Japie Coetzee, wat 26 jaar saam met Swigelaar skoolgehou en hom as skoolhoof van Laerskool Bergsig opgevolg het, het in sy huldeblyk gesê hy sal hom onthou as ‘n man met ‘n skerp ondersoekende brein en innoverende denker vir wie almal baie lief was.
“Meester Simon was ‘n skoolhoof wat altyd by alles van die skool betrokke wou wees.”
Die voormalige president van SWDkrieket, Rudi Claassen, het in sy huldeblyk gesê hy sal Swigelaar onthou as ‘n ware en gerespekteerde krieketambassadeur en iemand by wie hy ontsaglik baie geleer het.
Nettie Antonie, ‘n ouddiaken van die Weyers Memorial United Congregational Church het gesê Swigelaar was iemand wat meer as sy deel vir sy kerk gedoen het. “Hy was altyd bereid om te gee,” het sy gesê.
Ds. Donald Moos het Swigelaar beskryf as een van die noukeurigste mense wat hy geken het.
Volgens hom was Swigelaar as voorsitter van die kerk se finanskomitee, baie presies en saam met sy oorlede broer, Stephen, het hulle die leidende rol gespeel tydens die bou van die kerksaal.
Twee van Swigelaar se kleinkinders, Lara en Cloe Swigelaar, het hul oupa geloof vir sy geduld en die waardes van die lewe wat hy hulle geleer het.
Volgens Stephen Swigelaar, ‘n broerskind, was sy oom ‘n ware steunpilaar in die familie. “Sy broers en suster se kinders was ook sy kinders en sy liefde vir almal sal ek nooit vergeet nie. Laat ons sy nagedagtenis vertroetel.”
Tydens sy begrafnisdiens Saterdag in ‘n stampvol kerk het die hoof- uitvoerende beampte van SWD-krieket, Albertus Kennedy, Swigelaar beskryf as ‘n
familiemens by uitstek.
“Oom Simon het geen steen onaangeraak gelaat om kwaliteit tyd saam met sy familie te spandeer nie.”
Volgens hom sal die kantoor van SWDkrieket nooit weer dieselfde wees nie.
Dit was egter duidelik dat sy lewe na die dood van sy vrou, Daphne in 2017, nooit weer dieselfde was nie.
Volgens Kennedy het Swigelaar oor ‘n tydperk van 75 jaar, eers as speler, later as skeidsregter en laastens as administrateur ‘n onbaatsugtige rol in krieket in die algemeen gespeel.
“Sy wysheid, kennis, lojaliteit en entoesiasme het ‘n belangrike rol gespeel in die vestiging van SWD-krieket as een van KSA se suksesvolste opkomende lede. Sy
rol binne eenwording van krieket in SuidAfrika is prysenswaardig en sy nalatenskap vir SWD-krieket is ongeëwenaard.”
Volgens Swigelaar se oudste kleinkind, dr. Simoné Groenewald, het haar oupa en ouma soveel mense se lewens geraak. “Albei het so baie in hul gemeenskap en hul kerk gedoen. Hulle was onafskeidbaar en het alle gebeurtenisse van hul kinders en kleinkinders bygewoon.”
Volgens Moses Jackson het Swigelaar die term Ubunthu ten volle uitgeleef.
“Ek is trots om vandag te sê. Ek is wat ek is, danksy Simon Swigelaar.”
Swigelaar word oorleef deur ‘n broer, Robert, drie kinders, Colin, Rodney en Jennifer Josephs, agt kleinkinders en ses agterkleinkinders.