Hooggeregshof weier aansoek van Brits
Die petisie wat ‘n voormalige wynhuisbestuurder in Oudtshoorn, Johan Brits (55), by die Wes-Kaapse hooggeregshof ingedien het vir verlof om teen sy skuldigbevinding te appelleer, is deur die hof van die hand gewys.
Volgens Eric Ntabazalila, woordvoerder van die Nasionale Vervolgingsgesag (NVG) is die uitspraak op 10 Desember 2023 gelewer.
Die hof se beslissing beteken dat indien Brits handdoek ingooi ten opsigte van sy skuldigbevinding hy nog teen sy tronkstrafvonnis kan appelleer wat nog vanjaar in die Wes-Kaapse hooggeregshof aangehoor moet word.
Brits, voorheen bestuurder van Kango Wyne en Kango Koöperasie in Oudtshoorn is reeds in 2015 skuldig bevind aan 23 aanklagte van bedrog en twee van die oortreding van die Wet op Drankprodukte en is in die Oudtshoornstreekhof tot nege jaar en nege maande gevangenisstraf gevonnis.
Hiervan is twee van die agt jaar vir bedrog opgeskort terwyl ‘n verdere jaar en nege maande gelyktydig met die onopgeskorte vonnis vir bedrog uitgedien kan word vir effektiewe tronkstraf van ses jaar.
Brits het ‘n vreemde produk, bekend as ‘Ale’, met wyn vermeng en dit onder die ou etikette bemark. Hy het ook seëls wat drie keer deur ‘n beampte van die departement landbou aan wyntenks aangebring is, gebreek.
Sy hersieningsaansoeke in die hooggeregshof sowel as in die appèlhof om teen die weiering van ontslag te mag appelleer, is van die hand gewys.
Streeklanddros Neels Nortjé het met vonnisoplegging gesê dat Brits nie aan ‘n eenmalige misdaad skuldig bevind is nie. Hy het ook sy eie drankwinkel bedryf sonder die wete van die direksie van Kango Wyne, wat tot sy afdanking gelei het.
Die streekhof het na die vonnisoplegging ‘n aansoek om verlof om teen die skuldigbevinding te appelleer van die hand gewys, maar wel verlof om teen die vonnis te appelleer. Borgtog van R20 000 is aan Brits toegestaan.
Advokaat Louis van Niekerk van die kantoor van die DOV is die aanklaer, terwyl adv. Marthinus Barnard namens Brits optree.