Baartman beste bouler in SA20
Oudtshoorn se suksesvolste krieketspeler in sy geskiedenis, Ottniel Baartman, is verlede Saterdag in Kaapstad (Nuweland) na die eindstryd van die internasionale Betway SA20-reeks aangewys as die toernooi se algehele beste bouler.
As deel van sy prysgeld het hy R200
000 ontvang.
Alhoewel
Baartman in die verlede al opgeroep is vir die Proteas en slegs deur beserings gekortwiek is, behoort sy naam nou van die eerstes op die nasionale spanlys te wees - veral in die T20-formaat. Ook behoort die skatryk Indiese Premierliga (IPL) nader te staan met hul tjekboeke om hierdie rowwe diamant op hul boeke te kry vir vanjaar se skouspel wat einde Maart begin.
In die eindstryd wat tussen Durban Super Giants (DSG) en sy span, Sunrisers Eastern Cape, beslis is, het die "orange army" soos die span bekendstaan, die loot gewen en eerste gekolf. Sunrisers kon 'n mededingende teiken van 204 lopies vir die verlies van drie paaltjies op die telbord plaas.
Behalwe vir die Engelsman, David Malan (6), het die topkolforde, Jordan Hermann (42), Tom Abell (55), Tristan Stubbs (56), Aiden Markram (42), almal waardevolle bydraes met die kolf gelewer.
DSG se kolfbeurt kon net nie aan die gang kom met die boultrio van Baartman, Marco Jansen (Proteaspeler) en Daniel Worral (Australië) wat behoorlik amok gesaai het.
Alhoewel Jansen uiteindelik vyf paaltjies platgetrek het, was dit Baartman wat die allerbelangrike paaltjie van Heinrich Klaasen (Proteaspeler) laat kantel het toe hy hom been voor paaltjie betrap het vir 'n eerstebal-nulletjie.
Hierdie paaltjie het die amptelike vreugdevure aan die brand gesteek vir die Sunrisers juis omdat Klaasen die tipe speler is wat tussen hulle en 'n oorwinning gestaan het. Om die vrees vir Klaasen se vermoëns in perspektief te stel, is hy boonop ook as speler en kolwer van vanjaar se SA20reeks aangewys. Baartman se algehele boulontleding was 2/17 lopies in drie boulbeurte.
DSG is uiteindelik vir 'n teleurstellende 115 lopies uitgeboul wat aan Sunrisers 'n oorwinning van 89 lopies besorg het. Dit was ook die tweede agtereenvolgende jaar dat Sunrisers die SA20-reeks gewen het.