Munisipaliteit verduidelik eiendomswaardasies
Die Oudtshoorn-munisipaliteit het hierdie week die nuwe waardasierol vir alle eiendomme binne sy jurisdiksie aangekondig. Kennisgewings wat die nuwe waardasies bevat, is aan eiendomseienaars gestuur as deel van die omvattende waardasieproses wat verlede jaar begin is.
Bo-aan die kennisgewing word daar aangedui dat die eiendomme ingevolge die Munisipale Eiendomsbelasting
Wet Nr. 6 van 2004, gewaardeer (algemene waardasie) is. Die doel daarvan is om waardasies in lyn te bring met markverwante waardes soos op 1 Julie 2023.
Aurelia Mle, woordvoerder van die Oudtshoornmunisipaliteit, het gesê dat inwoners geleentheid het om besware teen die waardasie van hulle eiendomme aan te teken en word aangemoedig om die betrokke beswaarvorms voor of op 1 April in te dien.
Die voorgeskrewe vorm vir indiening van ‘n beswaar is op versoek beskikbaar by die kantore of kan by www.oudtshoorn.gov. za afgelaai word. Sy het verder gesê dat die voorlopige waardasierol beskikbaar sal wees vir publieke besigtiging by die munisipale kantore in Dysselsdorp, De
Rust en Oudtshoorn vanaf 1 Maart tot 1 April.
"Dit is noodsaaklik om te verstaan dat munisipaliteite wetlik verplig is om waardasierolle elke vyf tot sewe jaar te hernu. Die waardasieproses word deur professionele, eksterne konsultante onderneem en neem verskeie faktore in ag, insluitend eiendomsverkooppryse en die aantal eiendomme wat in verskillende gebiede verkoop word."
Luidens haar verklaring word munisipaliteite verder deur wetgewing verplig om eiendomsbelasting op grond van die jongste waardasierol te bereken.
"Eiendomsbelasting word met behulp van 'n formule teen 'n spesifieke koers bepaal. Die Groter Oudtshoornmunisipaliteit is daartoe verbind om die huidige koers wat vir eiendomsbelastingberekeninge gebruik word, te hersien en moontlik te verlaag. Die hersiene eiendomsbelastingkoerse is geskeduleer om vanaf 1 Julie geïmplementeer te word."
Sy sê dat die munisipaliteit die publiek wil verseker dat alle voorgeskrewe regulasies, soos deur die wet vereis, noukeurig gevolg word deur hierdie waardasieproses.
Vir navrae en verdere inligting, kan die munisipale waardeerder, Lee-Ann Geswindt, per e-pos by geswindt@oudtmun.gov.za gekontak word.