Gift of the Givers help in Ladismith
Gift of the Givers het, na ingryping van 'n onderwyser van Laerskool Towerkop in Ladismith, ingegryp en aan 500 behoeftige gesinne kospakkies voorsien.
Volgens Keith Meyer, die onderwyser wat die nood raakgesien het en vir hulp van Gift of the Givers gevra het, was daar baie gesinne wat weens die kragonderbreking, wat dele van die Karoo lamgelê het, sonder kos gelaat is.
Kragtoevoer was vir meer as 'n week afgesny as gevolg van transmissietorings wat op 2 Februarie weens 'n storm omgeval het. Dié onderbreking het onder meer inwoners van Ladismith geraak en omdat daar geen elektrisiteit was nie, was dit moeilik om kos in yskaste en vrieskaste te berg.
Emily Thomas-Paulse, projekleier van die Gift of the Givers-span, het gesê dat sy 'n e-pos ontvang het waarin Meyer die situasie rondom die kragonderbreking verduidelik, sowel as die gevolge daarvan op die gemeenskap.
Dit het die span net twee dae geneem om alles bymekaar te kry. Hulle het die skool op Woensdag, 14 Februarie besoek en kospakkies aan die mees behoeftigste leerders uitgedeel.
Volgens Thomas-Paulse het die pakkie basiese produkte soos boontjies, mieliemeel, blikkes vis, pasta, pap en twee vyf liter waterkanne bevat.
Meyer het gesê dat hy na Gift of the Givers uitgereik het omdat hy gesien het hoe swaar die gemeenskap kry. Die oorhandiging van die pakkies het glad verloop en was die dankbaarheid op die gesigte van ouers opmerklik.
Thomas-Paulse het gesê dat sy die opgewondenheid onder die kinders waargeneem het.
Intussen het nog ’n ramp Ladismith getref toe daar tekens van die E. colivirus in die drinkwater opgespoor is. Die Kannaland-munisipaliteit het die inwoners versoek om eers water te kook voor dit gebruik word . Geen verdere verklaring hieroor is nog ontvang nie.