Inwoner wil jukskei laat herleef
Pieter Heydenrych (85), 'n nuwe inwoner van Oudtshoorn, het dit sy doel gemaak om jukskei in Oudtshoorn te laat herleef.
Heydenrych en sy vrou, San, het 'n paar maande gelede in Oudtshoorn kom woon om nader aan hul dogter, Dina Coleske, te wees. Hy was in sy jonger dae 'n kranige sportman en het tot op 45-jarige ouderdom nog vir Oos-Vrystaat rugby gespeel.
"Ek het in Naboomspruit afgetree en daar was ek ongeveer vyf jaar by jukskei betrokke. Toe ek hier aankom het ek 'n sport gesoek waarby ek kon aansluit, maar ek het besef dat hier nie geweldig baie is om van te kies as jy ons ouderdom is nie. Dit gaan ook oor samesyn en deel word van die gemeenskap van Oudtshoorn. Ek het bietjie rondgevra en uitgevind dat hier wel jukskeibane is en toe besluit om die water te toets en te kyk of hier nog mense is wat sal belangstel. My groot doel is om die fokus te plaas op aktiwiteite waaraan ouer mense ook kan deelneem. Jukskei is ideaal, want dit werk nie op jou knieë nie."
Volgens hom is jukskei ook nie net 'n sport vir bejaardes nie, maar kan deur enige persoon van enige ouderdom gespeel word. Die spel bestaan uit die gooi van ‘n skei, oor ‘n vasgestelde afstand, in die rigting van die pen, wat in die sandput geplant is.
Dit word in spanverband van twee of meer persone gespeel. Die spanlede hoef ook nie dieselfde ouderdom te wees nie.
"Jy kan saam met iemand van enige ouderdom in 'n span wees. Jy hoef ook nie vreeslik sportief te wees nie, jy moet net mooi kan korrel," skerts hy.
Heydenrych sê die uiteindelike doel is om jukskeikampioenskappe na Oudtshoorn te bring.
"Die dorp het soveel potensiaal. Dalk kan ons die liefde vir die sport in omliggende dorpe aanwakker en nog spanne kry om deel te neem. Die munisipaliteit het ook onderneem om na afloop van die KKNK die jukskeibane by die De Jagersportkompleks te herstel."
Henry Gerber, voorsitter van SWDjukskei Eden-distrik en bestuurslid van die Wes-Kaapse Jukskei Federasie, sê dat Oudtshoorn jare gelede 'n jukskeiklub gehad het, maar dat dit iewers doodgeloop het.
"Daar is klubs regoor die Eden-distrik waaronder Hartenbos, Riversdal en George. Ons is veral op soek na jong spelers wat by ons kan aansluit. Dit sal fantasties wees as ons weer in Oudtshoorn kan begin en toernooie daar aanbied."
Aurelia Mle, woordvoerder van die Oudtshoorn-munisipaliteit, het gesê die munisipaliteit sal na afloop van die KKNK die herstel van die baan oorweeg.
Die jukskeiklub sou eers vasstel hoeveel belangstelling daar is vir die sport om te bepaal hoeveel putte oopgegrawe moet word.
Enigiemand wat belangstel om deel van Oudtshoorn se jukskeiklub te word kan Gerber by 073 703 4311 kontak.
Jukskei is nie net ‘n sport vir bejaardes nie, maar kan deur enige persoon van enige ouderdom gespeel word.