Vetpret by Eljada Kairos Skool
Eljada Kairos Skool se atletiekbyeenkoms verlede week by De Jager-sportkompleks se tartanbaan het vir groot opwinding gesorg.
Ouers en ondersteuners het reeds vanaf 07:30 opgeruk na die atletiekbaan om die atlete te ondersteun.
Alhoewel daar vooraf reën geval het, het dit opgeklaar waarna die byeenkoms in koel en ideale weerstoestande vir naellope voortgesit is. Die vorige dag is die velditems afgehandel wat diskus, verspring, gewigstoot en spiesgooi ingesluit het.
Eerste aan die beurt was die rolstoelatlete wat die dag op 'n hoë noot in hul naellope begin het. Die atlete, wat bygestaan is deur personeel van die skool om die rolstoele te stoot, was sigbaar opgewonde en het hul wit pom-poms gedurende die resies entoesiasties vir die juigende skare gewaai.
Atlete wat kwalifiseer vir rolstoelresies sluit atlete in met geamputeerde ledemate, rugmurgbeserings, serebrale gestremdheid en swaksiendheid (gekombineer met 'n ander gestremdheid).
In die res van die naellope was daar hope talent te bespeur met atlete wat periodiek soos die wind oor die tartanbaan gevlieg het. In sommige wedlope was die wil van die vlees om die wedloop te voltooi, 'n selfs groter oorwinning as die eerste atleet oor die wenstreep. So het trotse ouers by die wenpaal geduldig en aanmoedigend vir hul bloedjies gewag en spontaan omhels met hul prestasie. Ander atlete se ouers het sommer saam met hul kleintjies by die wegspringblokke aangetree - iets wat die atlete selfs meer aangedryf en geniet het. Al die skool se rolstoelatlete gaan die komende naweek aan die Outeniqua Chair Challenge (OCC) in George deelneem. Hierdie 5 km-sirkelwedloop spring weg by Carpe Diem Skool wat strek deur Yorkstraat.