Man vergeet ID in huis waar hy inbreek
‘n 31-jarige man van Matjiesrivier buite Oudtshoorn, wat sy identiteitsdokument in die huis waar hy ingebreek het agtergelaat het, is verlede week in die Oudtshoornstreekhof gevangenisstraf van 16 jaar opgelê nadat hy op twee aanklagte van huisbraak, en een van roof met verswarende omstandighede skuldig bevind is.
Op drie ander aanklagte van bemoeiing met ‘n lid van die mag, opsetlike saakbeskadiging en aanranding van ‘n polisiebeampte is hy vrygespreek.
Jason Farao het op 17 Junie 2022 by die woning van Clayton Zeelie ingebreek en op 8 Oktober dieselfde jaar by Voorbedacht Primêr.
In die huis van Zeelie het hy verskeie items in ‘n sak gepak, waaronder sy ou skoene, nadat hy ‘n paar tekkies van Zeelie aangetrek het.
Hy het Zeelie se vriend, Gareth Ross, met ‘n mes gedreig toe Ross wakker geword het om badkamer toe te gaan en toe hy vlug het hy die sak, waarin sy identiteitsdokument was, op die toneel vergeet.
Streeklanddros Daniel Boks het met vonnisoplegging gesê dit is duidelik dat Farao ‘n gevaar vir die mense van Matjiesrivier inhou en lank uit die gemeenskap geneem moet word.
“Die beskuldigde gee nie om vir die kinders van Matjiesrivier se toekoms nie en om by ‘n huis in te breek terwyl daar mense binne is, is gevaarlik. Een kon dood gewees het. Die beskuldigde het ook geen ander keuse gehad om skuldig te pleit nie want hy het ‘n belangrike dokument op die toneel vergeet. Die misdade getuig van absolute wetteloosheid en barbaarsheid.”
Farao is op aanklag een, inbraak by die skool, tot ses jaar gevangenisstraf gevonnis en tien jaar op aanklag twee en drie, huisbraak en roof, opgelê.