ODN-skole ontvang pryse vir groentetuine
LIEZL VAN NIEKERK EN STEFAN GOOSEN
Twee skole van Oudtshoorn het verlede week toekennings ontvang vir die Wes-Kaap se 2023 provinsiale skooltuinkompetisie.
Bongolethu Primary spog met die eerste plek, terwyl Oudtshoorn Vaardigheidskool 'n tweede plek in die C-afdeling van die Nasionale Skoolvoedingsprogram (NSVP) ontvang het. Die direkteur van die NSVP in die Wes-Kaap, Lindelwa Sopotela, het spesiaal die skole verlede Woensdag, 21 Februarie, besoek om hul persoonlik geluk te wens en 'n sertifikaat te oorhandig.
Sopotela het gesê dat dit uitstekende prestasies is, siende dat die skole hul groentetuine in 2022 begin het. Die afdeling sluit skole in wat in dorre of droë gebiede geleë is. Vaardigheidskool het prysgeld van R10 000 ontvang en Bongolethu Primary het R15 000 ontvang.
Bongolethu Primary
Yoliswa Jafta, skoolhoof van Bongolethu Primary, sê hulle is geweldig trots op die skool se prestasie.
"Die eer moet eintlik gaan aan Tsebiso Marenene, ons tuinier. Hy het geweldig hard aan die tuin gewerk en kom self vakansies en naweke in om seker te maak dat die tuin natgemaak word, die onkruid uitgetrek word en dat alles veilig is."
Jafta sê die skool het 'n gerekenariseerde besproeiingstelsel gehad, maar dit is kort na installasie gesteel.
"Die groente wat gekweek word, word nie net vir die skool se voedingskema gebruik nie. Ons tuin is so 'n groot sukses dat ons selfs van die groente kan verkoop. Die wins wat gegenereer word, word weer in die tuin in geploeg," verduidelik sy.
Volgens haar is die onderwysers en leerders van die skool ewe entoesiasties.
"Die tuin word ook in onderrig gebruik. In party van die vakke leer die kinders van die tipe grond waarin geplant kan word, of gewasse, of besproeiingstelsels. Ons kan hulle nou na die tuin toe neem en dan kan hulle sien hoe groei die plante of voel hoe voel die grond. Hulle sit dus nie net heeldag in die klas nie, maar kom buite en beleef goed prakties en wek nuwe belangstelling in die werk."
Die projek is so suksesvol dat van die ouers, leerders en onderwysers al begin om self hul eie groentetuine te plan.
"Ons beoog om dit nog uit te brei sodat ons wins vir die skool kan genereer en miskien 'n ordentlik sportveld vir die kinders kan bou."
Marenene sê hy het niks van tuine en plant geweet nie. "Ek het maar myself geleer, maar geniet wat ek doen geweldig baie. Ek is trots op dit wat ek bereik het."
Marenene het reeds besig om 'n tweede groentetuin by die skool te plant.
Vaardigheidskool
Volgens die hoof, Gavin Block, is die skool baie oorweldig met hul eerste probeerslag en die tweede prys in die kompetisie.
"Ons is nuut in die kompetisie, maar dit gaan nie soseer oor die kompetisie nie, dit gaan oor die deelname en betrokkenheid. Ons het besef watter waarde dit kan toevoeg tot die skool en wat dit beteken vir ons kinders en die skoolgemeenskap. Ons praat baie van volhoubaarheid en kosvoorsiening en hier het ons dit ervaar, hoe 'n groentetuinprojek waarde kan toevoeg tot 'n skool," het hy gesê.
Buiten die skool se hooftuinier, Hendrik Oktober, het van die skool se leerders ook betrokke geraak met die natmaak van die tuin en die oes van die groente.
Op die oomblik word meeste van die oes van die skool se groentetuin na die Vaardigheidskool se koshuis gestuur om te verseker dat daardie leerders 'n gebalanseerde dieet kry, en ander groente van dieselfde oes word dan vir die skool se voedingsprogram gebruik.
"Die prysgeld gaan primêr terug in die groentetuin gestoot word om saad, plantjies ensovoorts aan te koop en sal verder gebruik word om die groentetuin te beskerm teen die skroeiende Oudtshoorn hitte.
Ons wil kyk in hoe 'n mate ons die groentetuin kan beskerm met nette of 'n tonnel om te verseker dat ons groente nie verbrand word nie," het Block gesê.