APD op pad na KKNK
Oudtshoorn APD (Association for Persons with Disabilities) gaan vanjaar vir die eerste keer 'n stalletjie by die Klein Karoo Nasionale Kunstefees hê om die produkte wat hulle maak te verkoop.
Leanne Jaftha, maatskaplike werker by APD, verduidelik dat hulle 'n organisasie verbonde aan die departement maatskaplike ontwikkeling is, wat spesifiek met persone met gestremdhede werk. Hulle het 'n kleuterskool vir kinders met gestremdhede, maar het ook werkswinkels vir volwassenes met gestremdhede in Oudtshoorn en in Dysselsdorp.
"Die volwassenes maak reeds vir 'n geruime tyd goedjies soos welkombordjies, geskenkpapier, lapsakke en self oorbelletjies uit volstruiseierdoppe, maar ons kon dit nooit in grootmaat vervaardig nie, omdat ons nie die finansiering of die gereedskap gehad het nie. Die jaar het ons finansiering van BASA, die departement van sport, kuns en kultuur, sowel as die Presidential Employment Stimulus ontvang wat vir 'n jaar geldig is. Dit het ons is staat gestel om gereedskap te koop sodat ons die eierdoppe kan knip, afskuur en gaatjies in boor. Die finansiering is vir 'n jaar geldig en maak selfs voorsiening 'n loon vir die persone wat dit maak."
Lisa Cooper, program-implementeerder van APD, sê die nuwe projek is vir hulle baie opwindend.
"Hier is tans, met die Dysselsdorp-tak, 44 volwassenes. Ons werk met persone met verskillende tipes gestremdhede. Baie van hulle is byvoorbeeld fisies gestremd weens beroertes of breinvliesontsteking as kind en kan dalk net een hand gebruik. Vir hulle om met soveel fyn detail te werk is absoluut ongelooflik. Hulle werk met groot trots om die oorbelle te maak."
Cooper sê sy hoop dat wanneer die mense die oorbelle koop, hulle sal besef hoe uniek elke item is.
"Ons het mense wat die vorms vir die oorbel met 'n potlood op die eierdop trek. Dan is daar mense wat die vorm met tangetjies uitknip. Die geknipte doppe gaan dan aan die span wat die afskuur tot al die kante mooi gelyk en glad is. Van daar af word die gaatjies met 'n fyn handboortjie geboor. Die oorbelle word daarna versier en aanmekaargesit, voordat dit verpak word."
Volgens haar is elke persoon wat iets vervaardig geweldig trots op wat hulle doen.
"Dit verg baie inspanning van hulle om als perfek reg te kry, maar hulle is so trots op hulself wanneer die finale produk klaar is en hulle weet dat hulle absoluut net hul beste gedoen het om dit te vervaardig. Vandat ons finansiering gekry het en die regte gereedskap het om als te doen en mooi te versier, is dit vir hulle soveel lekkerder."
Cooper sê wanneer die fees verby is, hoop hulle om met die produksie van hul items voort te gaan sodat hulle hul produkte aan besighede kan verskaf.
"Ons hoop om 'n wins te kan genereer sodat ons meer vir ons kliënte kan doen."
Vir meer inligting kan APD by 044 272 2106 gekontak word.