Pardoning Teachers’ Movement gestig
Die nuutgestigte Pardoning Teachers’ Movement (PTM) wat onlangs op die been gebring is, het die afgelope naweek hul eerste volwaardige vergadering gehou.
Volgens die stigter, Glen Snyman, bestaan dié organisasie uit huidige onderwysers, afgetrede onderwysers en lede van die gemeenskap. Die doel van die organisasie, volgens Snyman, is om leerderdissiplinebeleide binne skole te ontwikkel.
"Te veel kere in die verlede het dit gebeur dat onderwysers elke dag kinders se kwade moet verduur, vergewe en vergeet, maar gebeur dit nie wanneer die skoen aan die ander voet is nie. Die organisasie is hier om seker te maak dat daar altyd 'n gesonde verhouding tussen die partye heers omdat opvoeding van ons kinders ons na aan die hart lê. Deur hierdie pogings wil ons ook die onderwysers se regte en werk beskerm wat ook bydra tot hul daaglikse emosionele en fisiese welstand binne die klaskamer. Die groot kwessie is wedersydse respek vir mekaar," het Snyman gesê.
Snyman sê verder dat PTM ook daarna strewe om die onderwysstelsel te verbeter:
"Die plan is om gereeld met die onderwysdepartement se beleidmakers te vergader ten opsigte van voorgestelde wysigings aan onderwysbeleide en ander relevante kwessies. Indien nodig, beoog ons ook om die onderwysdepartement op regsplatforms te konfronteer rakende die uitkomste van sekere kwessies in 'n poging om die stelsel reg te stel. Ons wil dit ook duidelik maak dat ons nie 'n vakbond wil probeer wees
of wil vervang nie. Ons werk is bloot ter ondersteuning van die onderwysdepartement ten einde die stelsel te verbeter waarby onderwysers, leerders en die departement sal baat."
Volgens Snyman is van die beleide wat PTM voorstel die gebruik van ‘n elektroniese dissipline databasisstelsel en 'n nasionale, eenvormige, basiese leerdergedragskode wat deur die hele onderwysdepartement en alle skole aanvaar word.
"Op die huidige oomblik het elke skool sy eie gedragskode volgens sy eie beheerliggaam. Die verantwoordelikheid van die onderwysdepartement om self sy eie leerdergedragskode of dissipline beleid te hê om sodoende onderwysers effektief te kan beskerm. Dit sal in ‘n arbeidshof getoets moet word. Hierdie tipe projekte is nou dringend nodig vir vandag se onderwysers, veral na die staat se instelling van die nuwe Bela Wet en die toenemende geweld in ons samelewing. Ons het reeds gehoor hoe ‘n 13-jarige gr. 6-leerder van Primrose Primêr in Johannesburg twee weke gelede sy skoolhoof met ‘n vuurwapen gewond het in ‘n mislukte moordpoging. As ‘n skoolhoof nie eens meer veilig is in ‘n geslote kantoor met toegangsbeheer nie, hoeveel te meer die kwesbare onderwysers wat voor 40 plus leerders daagliks moet staan. As ons land nie slaag in effektiewe onderwys nie, dan stort alles in ons samelewing in duie."
Alle belangstellendes wat by PTM wil aansluit kan Snyman by 072 3424 926 kontak of e-pos by glensnyman1@gmail. com. PTM se webwerf kan ook besoek word by www.teachersrights.co.za.