Toutrekkampioenskappe lok 100de
Die Timbercity Overberg Eden-toutrekbyeenkoms wat verlede Saterdag by die Oudtshoorn Vaardigheidskool se sportterrein plaasgevind het, het soos gewoonlik honderde toeskouers gelok. Vanjaar was dit ook die 10de keer dat hierdie byeenkoms aangebied is.
Volgens Gavin Block, hoof van Oudtshoorn Vaardigheidskool asook organiseerder van die toutrekbyeenkoms, het meer as 147 spanne van 27 skole met 'n totaal van 713 toutrekkers vanjaar deelgeneem. Sowat 115 afrigters het hul onderskeie spanne vergesel met 28 beamptes wat die byeenkoms gereguleer het.
Hierdie statistiek is volgens Block 'n bewys dat die sportsoort teen 'n massiewe pas groei. Block was ook vol lof vir Laerskool Laurus en Laerskool Wesbank se entoesiasme om konstant goeie spanne in te skryf.
Timbercity is deur hulle borgskap, direk verantwoordelik vir die groei van toutrek en Block het die eienaar, Andrè van Greunen, weer oudergewoonte bedank vir hul betrokkenheid.
Die dag is gekenmerk deur totale oorheersing van Oakdale in die seuns (stewels)afdeling in die kategorieë wat die 400 kg, 440 kg, 480 kg, 520 kg, 560 kg en 600 kg ingesluit het.
Wat die kleintjies in die kaalvoet-afdeling betref, het spanne soos Buffeljagsrivier en Suurbraak Primêr die toon aangegee. Die gasheer, Oudtshoorn Vaardigheidskool beter bekend as die Valkies, kon 'n silwermedalje in die 520 kg gemengde stewels kategorie inpalm.
Vir baie atlete is hierdie toutrekkampioenskappe die hoogtepunt van die seisoen.
Die topspanne in hierdie kampioenskappe gaan deur na die nasionale toutrekkampioenskappe wat vanaf 14 tot 16 Maart in Kimberley in die Noord-Kaap gehou word.