Icosa mis die afsnydatum vir verkiesing
Die Independant Civic Organisation of South Africa (Icosa) het versuim om betyds vir die nasionale- en provinsiale verkiesing wat 29 Mei plaasvind, te registreer en sal daarom nie aan vanjaar se verkiesing deelneem nie.
Luidens ’n mediaverklaring wat Maandag 11 Maart deur Nadia Blaauw, Icosa se woordvoerder, uitgereik is, kon die party aanlyn registreer of die dokumente per hand indien, maar het hulle besluit om die dokumentasie persoonlik in te doen en het na Pretoria gery.
"Op 8 Maart was Klaas Lesholi, die algemene sekretaris van Icosa en vier ander lede by die onafhanklike verkiesingskommissie (OVK) se kantore in Riverside. Hulle het die aansoeke om 15:06 ingedien. Op daardie stadium het die OVK gesê, selfs al handig ons dit per hand in moet ons 'n skakel per e-pos ontvang om ons handtekeninge aanlyn by die aanlyn kandidaat-nominasiestelsel in te dien. Om 15:39 met baie min tyd tot die afsnytyd, het ons die skakel aangevra, maar tot vandag toe is geen sodanige e-pos aan Icosa-leierskap gestuur nie. Selfs na verskeie oproepe na hul kantore met die hoop om steeds die sperdatum te haal."
Volgens Blaauw was die party voorbereid en het hulle hul registrasiefooi en oorgenoeg handtekeninge gehad.
"Icosa het nie die OVKsperdatum gehaal nie, en sal nie aan die komende verkiesings deelneem nie. Icosa sal 'n dringende vergadering hou om die pad vorentoe te bepaal, en sal met die geregistreerde kiesers wat die petisie onderteken het, Icosa-lede en ondersteuners in gesprek tree. Icosa-raadslede sal voortgaan om ons gemeenskappe te dien en wil graag al ons besoekers en ondersteuningspersoneel bedank vir hul bydra tot ons kieserspetisielys aangesien ons hoeveelheid kiesers se ondersteuning toegeneem het tot dubbel die getal in vergelyking met die vorige nasionale verkiesingsjare," lui die verklaring.
Volgens Icosa-partyleier en burgemeester van die Kannaland-munisipaliteit, Jeffrey Donson, oorweeg hulle nie op die oomblik regstappe nie.
"Die Khoisan-mense is weereens onderdruk. Icosa is die arm mense se party van keuse, en is van hul reg om te stem ontneem. Alle Icosaraadslede in hul onderskeie dorpe sal voortgaan om hul kiesers te dien."
Volgens hom sal daar binnekort 'n dringende aanlyn vergadering met die nasionale uitvoerende komitee wees om die pad vorentoe te bespreek.
"Ons het meer as dubbeld die potensiële kiesers en ondersteuners as in vorige verkiesings gewerf."