De Wet nou in SA veerpyltjiespan
Daniël-Rudolph De Wet, lid van Die Crows-veerpyltjieklub, is vandeesmaand opgeneem in die SA veerpyltjiespan wat van 23 tot 29 Junie in Bloemfontein gaan meeding.
De Wet vertel trots dat sy liefde vir veerpyltjies slegs 'n paar jaar gelede begin het toe hy per toeval die PDC (Professional Darts Corporation) op televisie begin volg het.
"Die opwinding, die drama en die vaardigheid het my regtig geïnteresseer en dit het al hoe meer na ’n lekker sport begin lyk. Vantevore het ons ook vir die pret by ‘n braai teen mekaar gespeel. My hele lewe lank is ek ook baie lief vir rugby en omdat ek 'n baie kompeterende mens is, het veerpyltjies so reg in my kraal geval," sê hy.
Volgens De Wet het hy sy eerste toekenning einde verlede jaar ontvang toe hy as speler met die beste vordering by sy klub aangewys is.
"Dis toe dat ek besef het dat ek 'n goeie natuurlike talent vir dié sport het en dis ook hoekom ek besluit het om deel te neem aan die SA proewe en die res, soos hulle sê," is geskiedenis. Sy mentors wat hom die fynere kunsies van die sport wysgemaak het is, Hoffie Nel en Stephan Swanepoel, sowel as sy spanmaats by die Crows-klub.
"Kyk, 'n ou skaaf maar altyd aan jou tegniek soos byvoorbeeld hoe om jou posisie voor die bord reg te kry vir meer akkuraatheid. Die goue reël is ook om soveel moontlik te oefen want dis al manier om jou hand-oog-koördinasie te verfyn. Vir nou beskou ek myself maar in my beginjare en wil dus nie te groot doelwitte stel nie. Dus is my fokus tans net op my eerste SA's wat voorlê - dis al klaar iets groot vir my om te bereik. Internasionaal kyk ek baie op na wêreldklasspelers soos Phil Taylor, Micheal Smith en Pieter Wright. My raad aan jonger spelers is om aan te hou al verloor jy soms. Met meer wedstryde word jy beter met jou kombinasies en ook deelname aan die dubbelspel sal jou algemene spel met rasse skrede verbeter," sê hy.