Munisipaliteit ondersteun plaaslike entrepreneurs
Die Groter Oudtshoorn-munisipaliteit het vanjaar, soos vorige jare, 10 plaaslike entrepreneurs ondersteun deur hulle van stalletjies by die fees te voorsien.
Volgens Aurelia Mle, woordvoerder van die Oudtshoorn-munisipaliteit, is dit vir die entrepreneurs 'n waardevolle platform om hul produkte ten toon te stel en hul handelsmerke te vestig.
"Entrepreneurs wat aan die KKNK-uitstalling deelneem, word deur 'n aansoekproses gekies, wat advertensies in plaaslike koerante en produkevaluering insluit om die kwaliteit en lewensvatbaarheid van hul aanbiedinge te verseker. Sodra hulle gekies is, is entrepreneurs verantwoordelik om te verseker dat hulle voldoende voorraad regdeur die fees het."
Volgens haar dui terugvoer van entrepreneurs wat voorheen by die fees uitgestal het, op 'n gemengde ervaring vanjaar.
"Terwyl baie stalletjiehouers meer netwerkgeleenthede, verbeterde atmosfeer en hoër verkope in vergelyking met vorige jare ervaar het, het sommige 'n afname in verkope opgemerk. Ten spyte hiervan het entrepreneurs hul waardering uitgespreek vir die platform wat die KKNK bied om hul produkte ten toon te stel en met potensiële kliënte te skakel," lui die verklaring.
Mle sê dat eerstekeer-uitstallers waardevolle leerervarings uitgelig het wat hulle deur deelname aan die fees opgedoen is.
"Hulle het geleenthede opgemerk om hul produksieprosesse te verbeter, hul netwerke uit te brei en hul uitstallingstrategieë te verfyn. Oor die algemeen het hulle die KKNK-uitstalling as 'n uitstekende geleentheid beskou om hul handelsmerke en produkte in die mark te vestig."