Paasnaweek rugby- en netbaltoernooi reusesukses
Die Paasnaweek rugby- en netbaltoernooi wat verlede Donderdag by Bridgtonsportterrein afgeskop het en Maandag 1 April geëindig het, is deur menige plaaslike sportliefhebbers as 'n groot sukses bestempel.
Die rugbytoernooi is deur Impact Sport Events aangebied. Plaaslike spanne soos Harlequins, All Blacks, Collegians, Bridgton,
Spring Roses, Bridgton, Oudtshoorn tesame met landelike spanne het almal mekaar in rondomtalie wedstryde aangedurf. Harlequins was uiteindelik die wenners met All Blacks wat tweede was. In die landelike afdeling het Rebels met die louere weggestap met Blue Birds wat die naaswenners was. In die netbal-afdeling was dit De Doornsnetbalspan wat bobaas was.
Volgens een van die organiseerders, Pieter Safers, het die bywoning deur die publiek alle verwagtinge oortref en het ongeveer
8 000 toeskouers oor dié vier dae by die hekke ingestroom. Safers sê dat daar geen ongevalle was nie en dat daar 'n gees van samehorigheid was wat deurentyd by die stadion geheers het. Safers het ook die stadion se fasiliteit geprys wat skoon en netjies was.
"Kyk vanjaar is die eerste jaar en ons is trots om te sien hoe die verskillende klubs opwindende rugby en netbal opgedis het. Die samewerking tussen die klubs is ook iets wat ons hoog op prys stel en volgende jaar beloof om selfs nog groter te wees."
Safers het sy waardering teenoor die borge uitgespreek waarsonder die inisiatief nie moontlik sou wees nie. Die borge het Herotel (hoofborg), Dryland, Bidvest, Pitch Vision, Wes-Kaapse departement kultuursake en sport, TFASA, Shoprite, Oudtshoornmunisipaliteit, Oudtshoorn Sweiswerke, Anton Goliath, Wilck Spar, Nebavest, Oudtshoorn Aero Club en Black List Sekuriteit ingesluit.