Ses aangekla, vyf afgedank
Vyf verteenwoordigers van die SuidAfrikaanse Munisipale Werkersunie (Samwu) wat verlede jaar 'n raadsvergadering ontwrig het, is op 26 Maart afgedank.
Die Oudtshoorn-munisipaliteit het dié nuus die week in 'n verklaring bekendgemaak.
Aangesien hierdie 'n interne aangeleentheid is, was die munisipaliteit nie bereid om die name van die persone wat betrokke was bekend te maak nie.
het verlede jaar berig dat 'n groep Samwu-lede 'n raadsvergadering op 22 September binnegegaan het, en dit geblyk het dat hulle raadslede gekeer het om die raadsaal te verlaat. Samwu-lede het voor die deur gestaan en onder meer in ’n woordewisseling met raadslede betrokke geraak. Die unielede wou 'n memorandum oorhandig. Die polisie en wetstoepassers is geroep om die situasie te ontlont.
Amy Sylvester, wat op daardie stadium die unie se sekretaris was, het verlede jaar gesê dat hulle 'n memorandum oorhandig het omdat hulle "siek en sat is daarvoor om stil te bly oor alles."
Hulle wou glo hê die hele raad moet sien wat aangaan. Die memorandum het kwessies aangeraak soos beweerde onwettige aanstellings, inmenging met administrasie en die toestand van munisipale geboue en beroepsgesondheid en -veiligheid. Die memorandum is aan die burgemeester oorhandig.
Luidens die verklaring wat Dinsdag
9 April uitgereik is, is ses van die unielede aangekla, maar net vyf is ontslaan. Die munisipale bestuurder, Walter Hendricks, het bevestig dat 'n deeglike ondersoek en tugproses onderneem is na die indringing van die ses Samwu-verteenwoordigers in die raadsaal waar hulle geweier het om die perseel te ontruim, ten spyte van versoeke van raadslede.
Oudtshoorn Courant
"Die ses werknemers is op spesiale verlof geplaas hangende die ondersoek. Vyf van die ses werknemers is skuldig bevind aan aanklagte wat verband hou met onwettige toegang tot 'n raadsvergadering en die gyselaarhouding van raadslede. Gevolglik is hierdie vyf werknemers op 26 Maart ontslaan," lui die verklaring.
Volgens Aurelia Mle, woordvoerder
van die Oudtshoorn-munisipaliteit het burgemeester Chris Macpherson, die raadsaal se heiligheid vir ordelike bespreking beklemtoon en die ongemagtigde toegang van die unielede veroordeel.
"Hy het later hierdie vakbondverteenwoordigers na sy kantoor genooi om die memorandum deur behoorlike kanale in te dien.
Volgens Hendricks het die munisipaliteit geen kriminele klagtes gelê nie en was die kwessies op die memorandum reeds aangespreek, maar was die unielede nie met die uitkoms tevrede nie.
Oudtshoorn Courant het ‘n navraag aan Samwu gestuur. Hulle het aangedui dat die unie nie op hierdie stadium kommentaar oor die aangeleentheid gaan lewer nie.