Imbizo’s volstoom aan die gang
Die jaarlikse burgemeesters-imbizo’s is volstoom aan die gang en het reeds op 8 April begin. Burgemeester van die Groter Oudtshoorn, Chris Macpherson, het aangekondig dié imbizo's tot 17 April sal plaasvind. Dit word gereël met die uitdruklike doel om inwoners die geleentheid te bied om insette te lewer ten opsigte van die begroting vir die komende jaar.
Volgens Aurelia Mle, woordvoerder van die Oudtshoorn-munisipaliteit, is die fokus van hierdie imbizo’s om inwoners se insette en vrae oor die samestelling en inhoud van die begroting te kry.
"Ons moedig alle inwoners aan om van hierdie geleentheid gebruik te maak om hul stemme te laat hoor en by te dra tot die begrotingsproses. Die imbizo’s gaan nie oor klagtes met betrekking tot dienslewering nie, maar eerder om 'n platform te bied vir konstruktiewe insette en betrokkenheid van die gemeenskap in die begrotingsproses."
So werk dit
Hierdie jaar se imbizo word anders gedoen as die vorige jare om dit vir die publiek makliker en meer toeganklik te maak.
Die publiek kan nou enige tyd tussen 15:00 en 18:00 op hulle geskeduleerde dae direk met Macpherson en die munisipale bestuurder Walter Hendriks, gesels. Tydens die konsultasie sal brosjures uitgedeel word met 'n opsomming van die begroting, voltooide projekte, toekomstige projekte en huidige deurlopende projekte.
Om hierdie gesprek te fasiliteer, sal die hoofde van die verskeie departemente teenwoordig wees om vrae te beantwoord en inligting te verskaf. Inligtingstukke sal ook beskikbaar wees.
Die datums: 8 April
- Wyk 11 om 15:00 by die Blomnekgemeenskapsaal, Dysselsdorp
9 April - Wyke 9 en 10 om 15:00 by die Dysselsdorp-gemeenskapsaal
10 April - Wyk 6 om 15:00 by die Rosevalley-biblioteek
11 April - Wyke 4, 5 en 8 om 15:00 by die Thusong-sentrum
15 April - Wyke 7 en 13 om 15:00 by die Bridgton-biblioteek
16 April - Wyke 1, 2, 3 en 7 om 15:00 by die CJ Langenhoven-biblioteek
17 April - Wyke 2, 9, 11 en 12 om 15:00 by die CJ Langenhoven-biblioteek