Traumakamer by hospitaal opgeknap en heropen
Die traumakamer by Oudtshoornhospitaal is op 26 Maart geopen. Personeel, taklede en donateurs van Solidariteit Helpende Hand, sowel as hospitaalpersoneel, was teenwoordig.
Solidariteit Helpende Hand Oudtshoorn-tak het in Julie 2023, in samewerking met die traumakamer se personeel, besluit om die vier vertrekke van die eenheid op te knap, sodat dit 'n volhoubare verskil in slagoffers se lewens kan maak.
Volgens Marlise Labuschagne, Wes-Kaapse assistent streekorganiseerder van Solidariteit Helpende Hand, het die projek hulle agt maande geneem om te voltooi.
"Dit het baie dinkskrums, deeglike beplanning, voortdurende gebed, harde werk en hulpversoeke aan die gemeenskap gekos, maar nou kan die tak spog met 'n verbruikersvriendelike traumaeenheid. Hulle het hul omgeeharte in die projek uitgestort. Die betrokke taklede het hulle in die skoene van die slagoffers geplaas om die dekor in die eenheid te gebruik om slagoffers se trauma draagliker te maak en hoop te skep. In die proses is goeie verhoudings met die hospitaalpersoneel opgebou; dit sterk hulle in hul taak en versterk sodoende die gemeenskap."
Volgens haar pas hierdie projek mooi in by Projek Heel, Solidariteit Helpende Hand Wes-Kaap-streek se bestaande ontwikkelingsprojek. Projek Heel het ten doel om bewusmaking van geweld en mishandeling in die gemeenskappe te kweek, slagoffers van geweld en mishandeling op alle terreine te ondersteun, kinders in hierdie verband te bemagtig, en die rolspelers in die hulpverleningsproses emosioneel te ondersteun.