ODN- en De Rust-toerisme spog by WTM
Die Tuinroete-distriksmunisipaliteit (GRDM), verantwoordelik vir toerismebemarking en -ontwikkeling, het verlede week aan die World Travel Market Africa 2024 (WTM Africa 2024) in Kaapstad deelgeneem. Die geleentheid is aangebied om die streek te bemark.
Die Oudtshoorn- en De Rust-toerismekantoor, saam met die Kango-grotte, Surval Boutique-olyflandgoed, Swartberg Experience en Kobus se Gat, het die geleentheid as deel van die Tuinroete- en Klein-Karoo-toerismekantoor bygewoon en die streek se toeriste-trekpleisters ten toon gestel.
Luidens 'n verklaring wat deur die GRDM uitgereik is, is die WTM Africa 'n bekende geleentheid in die toerismebedryf, waar daar jaarliks meer as 6 000 professionele persone byeenkom om die nuutste neigings en geleenthede in beide inkomende en uitgaande Afrika-reismarkte te verken en met belanghebbendes in die toerismebedryf te vergader.
Die Tuinroete- en Klein-Karoo-toerismekantoor het vanjaar die grootste uitstalruimte in die streek se geskiedenis gehad, om te verseker dat die kollektiewe aanbiedinge
van die streek uit gelig word. Dié platform het nie net die streektoerismekantoor vertoon nie, maar ook plaaslike toerismekantore en hul onderskeie produkte, alles onder die vaandel van Tuinroete en Klein-Karoo.
“Ons is verheug om die Tuinroete en Klein-Karoo-streek by WTM Africa 2024 te verteenwoordig,” het Denver Garden Route
Johnson, GRDM-toerismebeampte, gesê. "Hierdie platform stel ons nie net in staat om ons asemrowende landskappe en diverse besienswaardighede ten toon te stel nie, maar beklemtoon ook ons toewyding om plaaslike besighede te ondersteun en verantwoordelike toerismepraktyke te bevorder."
Volgens Corleen Barnard, toerismebestuurder van die Oudtshoorn- en De Rusttoerismekantoor
is bestemmingsbemarking van kardinale belang vir die area.
"Ons kan direk met nasionale en internasionale toergidse en toeroperateurs werk en hulle kan fisies sien watter produkte ons bied. Almal baat daarby. Volgehoue bemarking van en deur al die rolspelers in die streek by so 'n geleentheid is uiters suksesvol en van onskatbare waarde."