Wesbank-tennisklub blink uit in dubbelstoernooi
Altesaam 46 spelers vanoor die Suid-Kaap en selfs twee van die Oos-Kaap het die afgelope naweek deelgeneem aan die Pam Golding Eiendomme /Wesbanktennisklub-dubbelspeltoernooi wat in ideale tennisweer op die bane van dié tennisklub aangebied is.
In die A-afdeling van die gemengde dubbels het George Wallace van die Georgetennisklub en Maaike Ferreira van Great-tennisklub met die louere weggestap toe hulle vir Zander Petzer van die Wesbanktennisklub en Annalize Potgieter van Great-tennisklub in die eindstryd geklop het. Ryk Smit (Mosselbaai) en Helena Smuts (Hartenbos) was derde.
In die B-afdeling was dit die ma-en-seun-kombinasie van Christine en Rheinier van Coller van die Hartenbos-tennisklub wat koning gekraai het deur vir Louis Pienaar van die Wesbanktennisklub en Christine Gouws van die George-tennisklub in die eindstryd te klop. Abrey Nel en Carla Botha van die Mosselbaaitennisklub was derde.
Die pa-en-seun-kombinasie, Cilliers en Marcell Petzer van die Wesbank-tennisklub, het die mansdubbelspelkompetisie gewen met ‘n oorwinning oor Gert Swart en Hans de Villiers van Mosselbaai.
Hugo van der Berg en Morné Tome van die Wesbank-tennisklub het derde geëindig. Daar was pryse vir al 46 deelnemers.
In ‘n eenpunt-toernooi waaraan al die spellers deelgeneem het en vir groot prêt gesorg het, het Maaike Ferreira van Great-tennisklub vir Rida Bester (Wesbank) in die eindstryd geklop en met prysgeld van R1 000 weggestap.
Die voorsitter van die Wesbanktennisklub, Louis Uys, het die toernooi as baie geslaagd beskryf en sy dank teenoor die hoofborg, Pam
Golding Eiendomme, al die borge sowel as die spelers uitgespreek.
Jacques de Beer van Pam Golding Eiendomme het versekering
gegee dat die toernooi beslis weer volgende jaar aangebied sal word en die hoop uitgespreek dat dit verder sal groei.