Harlequins wen riller teen Baabas
Rugbyondersteuners is verlede Saterdag getrakteer met 'n drieëfees in die SWD Super A-ligawedstryd tussen Mosselbaai Barbarians en Harlequins Magte wat by die Infanterieskool se sportterrein gespeel is.
Dié opwindende wedstryd is uiteindelik met 48 - 41 deur
Harlequins gewen. Baabas was voor die wedstryd die voorloper op die algehele punteleer terwyl Harlequins slegs die 12de posisie beklee het na twee wedstryde. Dit was duidelik dat die tuisspan deur die groot skare aangevuur was en het hulle in die eerste helfte soos 'n koeël uit 'n geweer weggespring om Baabas van meet af aan onder druk te plaas. Harlequins se jong spelbreker, Jaylen Pretorius, het weereens beïndruk met sy hardlooplyne en spoed waarmee hy geskakel het met die agteren voorspelers. Sy giftige skopvoet tesame met 'n kommerkoelmentaliteit maak hom definitief een van Harlequins se groot fondse die afgelope twee seisoene. So effektief was Harlequins se dominansie met die rustydtelling op 24 - 12 in hul guns dat niemand die tuisskare sou blameer as hulle verwag het dat Harlequins met die wedstryd sal weghol nie.
Baabas het egter in die tweede helfte briljant teruggeveg om hulself met enkele minute se speeltyd oor, steeds in die wedstryd te hou. Vir Harlequins was dit glad nie 'n geval van oorgerustheid nie, inteendeel, die tuisspan het self na 'n hoër rat oorgeskakel, maar ten koste van gebrekkige eerste linie verdediging.
Ook Baabas se verdediging het veel te wense oorgelaat, maar ten minste kan hulle met hul koppe omhoog loop dat hulle 'n goeie stryd tot die bitter einde geveg het. Beide afrigtingskorpse sal deeglik bewus wees van hul spanne se leemtes veral in 'n elite liga wat super kompeterend is.
Jaylen Pretorius was suksesvol met ses doelskoppe en twee strafskoppe.
Die spoedvrate Glenwil Lewis en John Slabbert het twee keer agter die doellyn gaan kuier met Jenovin Fortuin en Sachen Wagenaar een drie elk. Harlequins B-span verloor 29 - 38 teen Barbarians B. Harlequins C-span verloor 9 - 47 teen Barbarians C.