Derde Jeugmark in Ladismith aangebied
Ladismith in die Klein-Karoo bied op 19 Junie hul derde Klein-Karoo Ladismith Jeugmark aan.
Volgens Carien Meyer, die stigter van die mark, vorm die mark deel van Jeugmaand en die wintervakansie.
Meyer vertel dat sy en haar gesin 'n paar jaar gelede van Somerset-Wes af na Ladismith getrek het, en sy het gesien dat daar nie veel geleentehede is vir kinders om sakgeld te verdien of hul talente ten toon te stel nie.
"My kinders is kreatief en kry nie sakgeld nie, ons glo hulle moet dit verdien. Ek het toe besluit om die mark te begin sodat my kinders 'n geleentheid kan kry om hul kreatiwiteit te deel, en om sakgeld te verdien. Ek het gedink dat dit vir die res van die gemeenskap se kinders ook kan lekker wees, en het dit toe vir hulle oop gemaak. Die eerste keer was 'n groot sukses en was op 'n koffiewinkel se voor- en agterstoep gehou. Jaar twee het ons 'n groter venue nodig gehad," vertel sy. Meyer sê dat dit 'n
spesiale geleentheid vir die jeug is waaruit hulle ervaring kan opdoen en leer. "Al die verkopers is 21 jaar oud en jonger. Die kwaliteit en verskeidenheid produkte wat te koop aangebied word, sal by alle ouderdomme en smake aanklank vind. Verlede jaar het die mark unieke geskenke, dekor, velsorg, blomme, plante, klere, boeke, kaartjies en natuurlik genoeg te ete en te drinke vertoon. Deelnemers het gewissel tussen ouderdomme 7 tot 19 jaar oud, en van so ver as Villiersdorp, Albertinia en Laingsburg gekom."
Volgens haar is die inskrywings vir hierdie jaar reeds oop sodat die entrepreneurs genoeg tyd het om te beplan en voor te berei. Die organiseerders poog ook om duplisering van produkte te beperk om te verseker dat die entrepreneurs die beste kans kry om 'n suksesvolle dag te hê.
Deur die maande wat tot die mark lei, ontvang deelnemers nuttige wenke en raad, en elkeen sal ook daarna 'n deelnamesertifikaat ontvang.
Vir meer inligting en inskrywingsvorms, kontak Carien Meyer by cariencm@ gmail.com of volg hulle op Facebook by Ladismith Jeugmark Wednesday 19 June 2024 en Instagram by @jeugmark2024.