Kaskarre sorg vir groot opwinding
Die kaskar-wedrenne wat die afgelope Saterdag in Rose Bank-woonbuurt plaasgevind het, het vir groot opwinding in die plaaslike gemeenskap gesorg. Hierdie resies is 'n inisiatief van kapt. Riaan Groenewaldt en sers. Mable Lewendal van die Oudtshoorn-polisie (sektor 1).
Volgens Groenewaldt is die lengte van die bult waar die resies plaasgevind het, sowat 800m in totaal alhoewel die wenstreep by die 250m merk was om genoeg ruimte te gee om te stop.
Altesaam 40 ryers het deelgeneem wat ook drie dames ingesluit het. Die verrigtinge het vanaf 09:00 tot 13:00 geduur en is begin deur die burgemeester van Oudtshoorn, Chris Macpherson wat die ryers amptelik afegesit het.
Dis veilig om te sê dat meer as 600 toeskouers die wedrenne met groot belangstelling aangepor het terwyl die kleintjies met elke wedren agter die ryers gesketter het uit pure uitbundigheid. Groewaldt sê dat die idee by hulle posgevat het toe hulle onlangs patrollie deur die buurt gery het en gesien het hoe die manne in 'n treintjie op die kaskarre ry. "Omdat ek 'n groot aanhanger van die Simola Hill Climb is het ek gedink dis 'n goeie idee om ook hierdie kinders soortgelyke blootstelling te gee wat in iets konstrukstief, opbouend en opwindends kan ontaard.
Die talent en vaardighede waarmee die manne hierdie kaskarre aandurf en bestuur spreek boekdele van hul ingesteldheid en die hele gemeenskap kan op die einde van die dag hierby baat as 'n mens kyk na die langtermyn impak."
Groenewaltd sê verder dat daar heelwat planne is om die kaskar-wedren na die volgende vlak te neem, maar dit sal eers later bekend gemaak word, het hy gesê. Al wat hy bereid was om te verklap was dat ander buurte ook betrokke gaan raak.
Groenewaldt het EdenFM, Alert Patrol, MG Waters, Pick 'n Pay, Super Quick en Timbercity vir hul borgskappe en betrokkenheid bedank.