Neil Hendricks bult sy spiere
Die Oudtshoorniet, Neil Hendricks het verlede Saterdag behoorlik sy spiere gebult toe hy eerste plek in sy heel eerste WesKaapse Sterkman-kompetisie verower het. Die kompetisie is by Langenhoven Gimnasium gehou en Hendricks het gepronk in die o.80kg novice-afdeling.
Oor sy prestasie sê Hendrick dat hy al vir 'n jaar "sommer vir die pret" spiere bou. "So 'n ruk terug het ek by die YsterGym aangesluit en dis hier waar die eienaar, Graeme, my genader het om aan bodybuilding deel te neem. So het ek sy advies geneem en stelselmatig begin vorder met my oefeninge. Powerlifting is maar 'n duur sport met gereelde etes om soveel moontlik calories in te kry omdat ek nie so baie vet wil aansit nie, maar eerder spiere. Die spreekwoord sê mos Big Ain't Strong," skerts hy. Hendricks sê sy doelwit is nou om in die nabye toekoms aan die wêreldkampioenskappe deel te neem. Nog 'n Oudtshoorniet en 'n bekende in die Sterkmankompetisie, Danovan le Roux, het Saterdag 'n tweede plek ingepalm.
Altsesaam 28 deelnemers, wat ook vroue ingesluit het, het van sover as Rwanda en Zambië ingekryf vir die kompetisie wat vir die eerste keer in Oudtshoorn plaasgevind het. Nodeloos om te sê het hierdie gespierde atlete se teenwoordigheid groot aftrek en verwondering onder plaaslike inwoners gelok. Die kategorieë waarin meegeding is was die deadlift, truck pull, log press, medley, sted push, super yolk en die farnes walk.
Een van die organiseerders, Shane Jensen, het aan Oudtshoorn Courant gesê dat vanjaar se kompetisie baie straf was en daar was selfs drie rekords gebreek.
Die groot trekpleister van die dag was die Afrika-kampioen, Chris van der Merwe, wat 'n allemintige 400kg gewigte opgetel het. Volgens Jensen het Van der Merwe in die verlede al 453kg gelig, maar is die 400kg beslis die swaarste gewig wat al ooit van Oudtshoorn-bodem af opgetel is.
Van der Merwe het die bielie in sy eerste probeerslag met groot aanmoediging van die skare gelig. Rekords is deur Jane Swarts (170kg), Vianè Nel (150kg) en Shaun Boshoff (238kg) opgestel.