Minister Mbombo besoek nuwe kliniek
Die Wes-Kaapse minister van gesondheid en welstand, prof. Nomafrench Mbombo, het Dinsdag 30 April 'n konstruksie-toesigbesoek aan die Ladismith-vervangingskliniek gelewer.
Volgens LukasAlbert, die minister se woordvoerder, sal hierdie fasiliteit die huidige kliniek vervang. Hy sê die kliniek wat tans gebruik word kan nie meer aan die toenemende gesondheidsorgbehoeftes van die groeiende bevolking voldoen nie.
"Die nuwe fasiliteit, sodra dit voltooi is, sal groter wees en meer sentraal geleë wees en sal uitreikpersoneel kan akkommodeer."
Die gebou moes einde Mei vanjaar al voltooi wees.
Mbombo het met haar intrap slag genoem dat sy nie tevrede is met die manier waarop die sitplekke in die wagkamer van die kliniek gerangskik is nie, en dat daar afdakkies buite die gebou moet wees wat pasiënte teen die elemente van die natuur moet beskerm, opgerig moet word. Die kliniek sal deur 'n operasionele bestuurder, ’n kliniese verpleegkundige en drie professionele verpleegsters behartig word. Ander mediese dienste soos die van tandartse, oogkundiges en fisioterapeute sal ook hiervandaan bedryf word. Sonkragpanele moet ook opgerig word. Voorts het die minister beklemtoon dat televisiemonitors so aangebring word dat dit nie slegs vir sekuriteitspersoneel sigbaar is nie, maar ook vir die verpleegpersoneel as veiligheidsmaatreël.
Die nuwe gebou, wat uiteindelik die Kannaland Gesondheidsadministratiewegebou sal heet, sal verseker dat die Alan Blythhospitaal meer ruimte vir administratiewe kantore sal hê en is ook nader aan die pasiënte.
Daar is ’n pragtige speelterrein aangebring, waar kinders op speelapparate die wagtyd kan verkort.
Die minister kon egter nie bevestig presies wanneer die kliniek voltooi sal wees en wanneer dit amptelik oorhandig en geopen sal word nie.