F1-renjaer ry ‘n draai in Karoo
Die wêreldbekende Finse F1-renjaer, Valtteri Bottas, het verlede naweek die ganse land en die Klein-Karoo behoorlik laat gons met die nuus dat hy in Suid-Afrika en meer spesifiek in Prins Albert kuier.
Hier het Bottas en sy vriendin, Tiffany
Cromwell wat ook 'n pro-fietsryer van formaat is, aan die Swartberg 100-uithoufietswedren deelgeneem het met beide wat uitgeblink het.
Bottas, wat vir Foundation Princesse Charlène de Monaco-span gery het, het sy staal dié keer op twee wiele in plaas van vier gewys en in 'n indrukwekkende sesde plek geëindig terwyl Cromwell, eerste oor die wenstreep in die vrouewedren was. Om sesde in sy ouderdomsgroep te eindig, beteken dat Bottas nou vir die UCI Fietsry gruis-wêreldkampioenskappe in België kwalifiseer wat later vanjaar in Oktober sal plaasvind.
Dit wil gedoen wees as 'n mens in ag neem dat die Swartberg100-fietswedren 'n veeleisende 170 km beslaan wat 'n uitdagende klim oor die Swartbergpas insluit. Hy het ook op sy Facebook-blad aangedui dat sy fietsryklere opgeveil sal word ten bate van liefdadigheidsprojekte van die Charlène de Monaco Foundation.
Nuus dat Bottas slegs 'n klipgooi weg is, het soos 'n veldbrand versprei en Jan Alleman op hol gehad met allerhande versoeke, scenarios en die moontlikheid van 'n persoonlike ontmoeting en selfs 'n foto saam met hom wat 'n realistiese moontlikheid was. Sommige het Bottas uitgenooi vir 'n tradisionele egte Karoobraai, ander weer vir 'n sappige gatsby terwyl ander hom weer aangemoedig om die plaaslike brandewyn met Coke uit te toets.
Selfs sy blonde "mullet" haarstyl het ook groot aanklank by SuidAfrikaners gevind.
Diegene wat F1-wedrenne volg sal weet dat Bottas sedert 2017 die spanmaat van die sewemalige F1-wêreldkampioen, Lewis Hamilton by Mercedes was. Gedurende sy
loopbaan met Mercedes het hy Hamilton gereeld die spreekwoordelike gas op die renbaan gegee waar hy altesaam 10 wedrenne en altesaam 58 podium plekke behaal het.
Bottas hou ook die rekord vir die vinnigste spoed in 'n F1 motor op die renbaan; 'n vreesaanjaende 372,5 km/h wat hy in 2016 se Mexikaanse Grand Prix opgestel het.
Tans is hy gekontrakteer by Stake SauberF1span nadat hy vir twee jaar lank by Alfa Romeo was.
Net twee gelede was hy in aksie by die Chinese Grand Prix en sal hy hierdie komende Sondag (5 Mei) weereens agter sy vuurwa by die Miami Grand Prix in Amerika sit.
Dié Grand Prix begin om 22:00 Sondagaand met die toetsritte wat Vrydag (3 Mei) wegspring waarna kwalifisering die volgende dag sal volg.