Munisipaliteit nooi entrepreneurs na maandelikse vlooimark
Die Groter Oudtshoorn-munisipaliteit nooi entrepreneurs, kunstenaars en handwerkers om deel te neem aan die eerste vlooimark wat by die Thusong Container Hub in Oudtshoorn en Dysselsdorp Thusongsentrum gehou gaan word.
'n Amptelike datum vir die vlooimark sal bepaal word na gelang van die hoeveel inskrywings wat ontvang word.
Die Thusong Container Hub is in November verlede jaar amptelik geopen en die vestiging hiervan was 'n gesamentlike poging tussen die munisipaliteit se departement van beplanning en ontwikkeling, die provinsiale departement van plaaslike regering en die departement van ekonomiese ontwikkeling en toerisme met die doel om plaaslike entrepreneurs die geleentheid te gee om hul eie besighede te begin.
"Om die entrepreneursgees binne ons gemeenskap te omhels, is vir ons belangrik. Dit is ook belangrik om te verseker dat ons kleinsakeondernemings finansieël groei. Ons moedig alle aspirant-entrepreneurs aan om hierdie geleentheid aan te gryp en deel van die mark te word," het Chris Macpherson, gesê.
Die vlooimark dien as 'n uitstekende geleentheid vir entrepreneurs en beginners om hul produkte, of dit nou handwerk, tuisgemaakte lekkernye of unieke items soos juweliersware en pottebakkery is ten toon te stel. Dit is 'n platform waar kreatiwiteit en wins ontmoet, wat aan verkopers die kans bied om hul passie in geld te omskep. Die munisipaliteit nooi alle entrepreneurs en handelaars uit om deel te wees van hierdie onderneming.
Greg Baartman, bestuurder departement plaaslike ontwikkeling het gesê: “Om by die vlooimark aan te sluit gee plaaslike entrepreneurs 'n kans om te skyn en ons gemeenskap se ekonomie 'n hupstoot te gee. Dit gaan alles daaroor om talent ten toon te stel en geld te maak.”
Om 'n veilige en aangename ervaring vir almal te verseker, moet deelnemers aan spesifieke kriteria voldoen. Dit sluit in die besit van 'n gesondheidsertifikaat vir voorafbereide kosse en wegneemetes, asook die besit van wetenskaplike toetssertifikate vir skoonheidsprodukte. Boonop is verkopers verantwoordelik vir hul toerusting, veral in die geval van wegneemkos.
Aansoekvorms
Individue of besighede wat daarna streef om deel te neem aan hierdie verrykende geleentheid word versoek om hul aansoekvorms te voltooi en nie later as Dinsdag 31 Mei voor 12:00 in te dien nie.
Aansoekvorms is beskikbaar by die munisipale kantore in St Johnstraat, Dysselsdorp Thusong-sentrum, en Oudtshoorn Thusong-sentrum.
Belangstellendes kan dit ook op die munisipaliteit se webwerf by www. oudtshoorn.gov.za kry. Die vorms is ook op versoek beskikbaar.
Stuur 'n e-pos aan Erna Wagenaar by erna@oudtmun.gov.za of aan Franxino Booysen by franxino@oudtmun.gov.za of kontak hulle by 044 203 3971 of 044 203 3061.