RSV nou in piekseisoen
Die afgelope paar weke is daar al meer mammas wat hulself tot sosiale media wend om ander ouers oor die impak wat respiratoriese sinsitiale virus (RSV) op jong babas het, te waarsku en hul storie te deel.
Volgens die Nasionale Instituut vir Oordraagbare Siektes (NIOS) is RSV tans in piek sirkulasie in die land. Die RSV-seisoen het vroeg in Februarie begin.
Volgens Nadia Ferreira, woordvoerder van die Wes-Kaapse departement van gesondheid, het die NIOS 'n toesigstelsel wat die sirkulasie van respiratoriese virusse regdeur die land monitor en het die departement in kennis gestel dat dit tans die piekseisoen van RSV is.
Sy sê RSV is die mees algemene oorsaak van brongiolitis en laer lugweginfeksie onder jong kinders en kan ernstige siektes by jong babas veroorsaak.
"Dit is hoogs aansteeklik en oordrag is hoofsaaklik deur respiratoriese druppels soos wanneer mense spoeg of speeksel wanneer mense praat of nies."
Simptome sluit in loopneus, vinnige, vlak asemhaling, kortasemheid en ‘n fluitgeluid in die bors, ‘n hoes, ‘n toe neus, koors, lusteloosheid of geïrriteerdheid.
Ferreira sê om te keer dat ander kinders aansteek met kinders met griepagtige simptome geïsoleer word. Dit is ook belangrik om kinders en volwassenes wat na babas omsien te leer om op die regte manier te hoes en nies deur eerder in die elmboog te nies of hoes of jou mond en neus met 'n sneusdoekie te bedek. Gooi gebruikte sneesdoekies in die vullisblik.
"Ouers en versorgers word versoek om hul kinders wat probleme ondervind met asemhaling, wat nie genoeg vloeistof drink nie en verslegtende simptome ervaar, onverwyld na die naaste gesondheidsfasiliteit of gesondheidsorgverskaffers te neem vir mediese hulp."
Graaff, die ma van Tylor Graaff, vertel dat haar babaseuntjie verlede jaar, toe twee maande oud, meer as 'n maand in die hospitaal was weens dié siekte en byna by die dood omgedraai het.
Volgens haar het hy in September verkouesimptome gekry en is sy met hom kliniek toe waar hy antibiotika gekry het, en hy het die kursus voltooi.
"Sy bors was egter steeds nie reg nie en hy
het steeds gehoes. Ons is terug kliniek toe en toe sê hulle hy het infeksie in sy longe. Hy het weer antibiotika gekry, maar hy het siek gebly. Oktober is ek met hom ongevalle toe waar hy 'n derde kursus antibiotika gekry het."
Graaff vertel dat Tylor einde Oktober met asemhalingsprobleme gesukkel het, en is hulle na 'n privaat dokter toe.
"Hy het suurstof gekry en ons is terugverwys hospitaal toe, want hy het longontsteking. Hy is later op TB-behandeling gesit en is vroeg in November ontslaan. Daardie selfde aand het ons met hom teruggejaag, want toe kry hy glad nie asem nie en hy het begin blou raak in sy gesig. Hy is 'n week later op die suurstofmasjien gesit."
Volgens haar is hy met die helikopter George toe gevlieg vir dringende ingryping.
"In George is hy op die C-pap-masjien gesit en later in die intensiewesorgeenheid opgeneem. Hulle het soveel toetse gedoen en plate geneem, maar hulle kon nie agterkom hoekom hy siek bly nie. Op 14 November het 'n professor van Rooikruis-kinderhospitaal hom kom besoek en hy was die een wat die diagnose gemaak het. Toetse het gewys sy lugwegpypie het vernou en hy moet Rooikruis toe gevlieg word sodat hulle kan kyk of hulle moet opereer. Ons vlieg toe die 22ste November Kaap toe. Dit was gelukkig nie nodig vir 'n operasie nie, maar hy was daar tot 1 Desember waar ons weer teruggeplaas is George toe. Hy is op 3 Desember ontslaan."
Graaff sê sy het die tydperk deur gebid en weet dat 'n hoër hand ingegryp het om haar kind te genees.
Dit is hoogs aansteeklik en oordrag is hoofsaaklik deur respiratoriese druppels soos wanneer mense spoeg of speeksel wanneer mense praat of nies.
Esmanick Graaff