Voorkeur vir volroom laat botterpryse styg

HESSEQUA Verbruikers se terugkeer na volroom-melkprodukte is glo die rede waarom die prys van botter so duur is.

Meer mense drink nou meer hoëvet in plaas van laevet-melk weens gesondheidsvoordele, asook spesiale diëete. Dr Koos Coetzee (Melkprodusente Organisasie) het die inligting aan Suid-Kaap Forum bevestig. Volgens hom is die skuif weens die Banting-beweging wat dr Tim Noakes sterk bevorder het, asook invoerpryse.

Suid-Afrika produseer gewoonlik nie genoeg bottervet nie en is tradisioneel ‘n invoerder van botter. Produsentepryse in Suid-Afrika moedig produsente nie aan om vetgemaakte melk te produseer nie, aangesien die premie vir bottervet laag is in vergelyking met die betaling vir vloeibare melk. Plaaslike verwerkers moet dus botter teen hoë pryse invoer.

Die prys van botter op internasionale markte het gestyg vanaf US $ 3 485 in Januarie 2015 tot US $ 5 925 in Julie 2017, ‘n styging van 70%. Terselfdertyd het die prys van afgeroomde melkpoeier met 12% gedaal. Die skerp styging in die botterprys is weens beide vraag- en aanbodfaktore. Aan die aanbodkant het die vraag na volroommelk en volle roomjogurt tot ‘n afname gelei in die hoeveelheid room beskikbaar vir botterproduksie. Bottervoorrade in die Europese Unie het afgeneem. Die melkpoeierprys ontmoedig verwerkers om botter en afgeroomde melkpoeier uit melk te produseer. Hoewel die aanbod aan plaaslike kleinhandelaars styf mag wees, is die kans dat die sekondêre bedryf genoeg botter sal lewer om aan die verbruikersvraag te voldoen.

Volgens die ‘Dairy Market Trends’-verslag vir Junie het Suid-Afrikaanse melkproduksie die eerste vyf maande van die jaar teleurgestel. Botterpryse is tans op rekordvlakke met pryse wat sedert April en Mei stadig begin opgaan het.

Melkproduksie gedurende Mei word op 229 miljoen liter geskat, 0.2% minder as in Mei verlede jaar. Produksie gedurende die eerste vyf maande van die jaar is marginaal af teenoor 2016. Die totale produksie vir 2016 word op 3 062 miljoen liter geskat. Sedertdien het hoër produksie en invoere tot ‘n klein toename in die totale aanbod gelei. Die totale melk aanbod in die eerste vier maande van die jaar is hoofsaaklik 5% hoër as in dieselfde tydperk verlede jaar weens hoër invoere. Na die effense afswaai in die begin van 2017 het pryse van wêreldsuiwelprodukte weer toegeneem. Daar is ‘n duidelike aanduiding dat internasionale melkprodukpryse stabiel sal bly en weer in 2018 sal toeneem. Die aansienlike toename in botterpryse versterk egter ander suiwelprodukte se pryse. Die erge droogte in die Wes-Kaap het ‘n uitwerking op melkprodukte se pryse, aangesien dit die produksie groei beïnvloed.