Polisie nuus
RIVERSDAL
Dranklisensies
Die gemeenskap moet kennis neem dat om drank by ‘n perseel te koop wat nie in besit van ‘n lisensie is nie, onwettig is. Gelisensieërde eienaars moet toesien dat hul nie drank aan minderjariges verkoop nie.
Toename in inbrake
‘n Toename in inbrake waar waardevolle items gesteel word is kommerwekkend. ‘n Beroep word op die gemeenskap gedoen om meer sekuriteitsbewus te wees.
Maak seker vensters en deure is toe. Inbrake by besigheidspersele steek weer kop uit. Besigheidseienaars en inwoners word gevra om enige verdagte optrede aan te meld.
Patrollies by leë huise
Persone wat uitstedig of met vakansie is, word aangeraai om die polisie daaroor in kennis te stel sodat die nodige patrollies gedoen kan word.
Verkragtings
Gedurende Junie en Julie is verkragtings aangemeld. Inwoners word gemaan om nie alleen te loop wanneer hul vanaf ‘n vermaaklikheidsplek af kom nie. Die polisie is bekommerd oor die verkragtings in die gebied. Verdagte persone met swart ‘toppie’ baadjies word saans opgemerk. Indien die persone opgemerk en verdag voorkom kontak die polisie onmiddellik.
Indien jou kind of familie tuis kom met besittings wat nie aan hul behoort nie, is dit jou verantwoordelikheid om dit aan te meld.
The Customer is King
Die polisie is tans besig met ‘n projek om die gehalte diens wat gelewer word, te bepaal. Dit heet ‘Customer is King’ en word terugvoer vanuit die gemeenskap verlang. Voorstelle is welkom en sal dit nagegaan word of dit haalbaar is of nie.
STILBAAI
Verneukspul
Die plaaslike speurafdeling doen ‘n beroep op sakemense om bedag te wees op ‘n nuwe slenter wat op die dorp kop uitgesteek het. Ao Marcelle Grebe noem aan Suid-Kaap Forum dat ‘n man van die Kaap twee hardeware besighede op die dorp gekontak, bestellings vir duur items ingesit en ‘n koerierdiens gereël het om die goedere op Stilbaai te gaan oplaai.
“Hy is duidelik vertroud met watter voorraad in die winkels is. Hy het ook ‘n bewys van betaling deurgestuur, so die besigheidseienaars het nie onraad vermoed nie. Eers nadat die koerier die goedere Kaap toe geneem het, is besef dat dit ‘n vervalste EFT betaling was” Grebe noem besigheidseienaars moet versigtig wees as dit kom by EFTbetalings. “Maak eers doodseker die betaling is wel gedoen voor jy goedere uit jou winkel laat gaan.”