Geen genade vir dwelmhandelaars
ALBERTINIA Twee vermeende dwelmhandelaars is op Donderdag 25 Januarie gearresteer en nog vier op Dinsdag 30 Januarie, waaronder een 'n vrou. In die eerste geval is die twee mans onderskeidelik op drie en twee klagtes vir die handeldryf in tik, mandrax en dagga in die Albertinia polisiëringsgebied gearresteer. Hulle was deur die gemeenskap geïdentifiseer as middelfigure in die aktiewe dwelmnetwerk in Hessequa. Beide hierdie handelaars was by Albertinialanddroshof gearresteer waar hulle toevallig op dié dag op 'n dwelmverwante aanklag verskyn het. In die tweede geval was vier vermeende dwelmhandelaars, 'n vrou (30) en drie mans tussen die ouderdomme van 32 en 39 gearresteer op verskeie aanklagte rakende handel met dwelms op die dorp. Tydens drie van die geïnisieerde lokvaltransaksies was daar by vier handelaars suksesvol dwelms aangekoop. Met nadere ondersoek het dit aan die lig gekom dat drie van die handelaars in familieverband hierdie misdaad pleeg en ook bevorder. Die plaaslike maatskaplike werker is genader om in te gryp, omrede die misdaad in aansig van jong kinders plaasgevind het. Stasiebevelvoerder kapt. Susan Botha het in Augustus verlede jaar konst. Christiaan Zwiegelaar en sers. James Spangenberg, verbonde aan die Da Gamaskop-cluster taakspan, 'Sunshine' genader om 'n in diepte ondersoek rakende 'n bestaande dwelmnetwerk te loots. Ander lokvaloptredes is deur die WesKaapse direkteur van openbare vervolging goedgekeur. Botha bedank hierdie twee lede vir hul opoffering, bereidwilligheid en toewyding om dwelmsmokkelaars aan die pen te ry. "Die lede stap altyd die ekstra myl, sonder addisionele beloning, altyd positief en stel 'n hoë standaard van polisiëring."