Hulde aan Stefan Marais
RIVERSDAL Almal wat Stefan Marais geken het, of dit sy ouers, familie, vriende, onderwysers of medeleerders by die Hoër Landbouskool Oakdale is, is dit eens dat dié jong leerder voluit geleef het, soos dit ook op die voorblad van die gedenkdiensblaadjie staan. Die NG Kerk Moedergemeente in Kerkstraat was Vrydag 26 Januarie stampvol deur almal wat 'n laaste eer aan hom wou bewys. Daar was selfs ‘n groot groep van Hoërskool Langenhoven se leerders en onderwysers. Al die personeel van die Handelshuis, wat onder andere skoolklere en –toerusting verkoop, was ook teenwoordig en het die eienaar, Johan Crous, die winkel vir die duur van die diens gesluit. In die gedenkblaadjie het sy ouers, Pine en Petrusa, asook sy jonger broer, Piet, ook hulde aan hom gebring. "Jy is só begaafd... perfeksionis in eie reg... 'n stil-sterk leier waarop mamma ongelooflik trots is," is van Petrusa se woorde. En "...My ster op die sportveld... 'n leier met nederigheid en 'n droomseun in die huis," aldus Pine. Piet het gesê Stefan is die beste broer waarvoor enige kind kan vra. "Ek sê vir God Hy kan nie 'n beter engel hê as jy nie..." Die Oorwinningslied het behoorlik deur die kerk weergalm en trane het vrylik gevloei. Stefan het 'n onuitwisbare indruk op hierdie gemeenskap gemaak. • Vir vorige berigte gaan na ons webtuiste by www.suidkaapforum.com