2 Vasgetrek vir MOORD

Die gemeenskap van die Hessequa-streek, en selfs landswyd, is geskok oor die wrede moord op Ona Hugo (80) en die aanval op haar vriendin, Hettie de Witt (92) op Vrydag 26 Januarie in die klein kusdorpie, Jongensfontein, ongeveer 10 km buite Stilbaai. Die

STILBAAI Die twee beskuldigdes wat Maandag 29 Januarie in Riversdallanddroshof vir die moord op Gideona (Ona) Hugo verskyn het, is uitgestel tot Vrydag 2 Februarie. Dié keer sal hulle op Stilbaai in die hof verskyn. Die 48-jarige James (Outa) Steyn van Heidelberg en Cornelius van Rooyen (41) van Riversdal is na ‘n grootskaalse soektog op Vrydag 26 Januarie op Vermaaklikheid gearresteer. Dit was slegs twee ure na die moord op Hugo (80) en die wrede aanval op Hettie de Witt (92) van Jongensfontein, vroegoggend dieselfde dag. Steyn en Van Rooyen het glo 'n spoor van verwoesting agtergelaat op hul pad na Jongensfontein. "Ses hawelose persone is onderskeidelik by Palinggat-opstal, die hawehoof en in die omgewing van die plaaslike polisiestasie aangerand en beroof," het kapt. Johan van Tonder, stasiebevelvoerder gesê. Hugo se buurman het vroeg Vrydagoggend onraad vermoed. By nadere ondersoek het hy gevind dat daar by die huis ingebreek is en het die polisie ontbied. Hugo se voertuig, 'n ouerige model Toyota was ook vermis. In 'n persverklaring deur die Suid-Kaapse polisiewoordvoerder, kapt. Malcolm Pojie, noem hy dat die opmerksaamheid van die gemeenskap en effektiewe kommunikasie op sosiale media met die buurtwag op Stilbaai het die belangrikheid van 'n vennootskap met die polisie gedemonstreer wanneer dit reg bestuur word. "Hierdie inisiatief wat deur die stasiebestuur, in samewerking met die gemeenskap geneem is, het tot die spoedige arrestasie van die twee verdagtes gelei." De Witt is per ambulans na Riversdalhospitaal geneem en is steeds in die hospitaal, volgens inligting nog baie getraumatiseer. "Die belangrikheid om aan ‘n buurtwag te behoort, kan nie oorbeklemtoon word nie. Hierdie vinnige arrestasie sou nie moontlik gewees het sonder die samewerking van die WhatsApp-groepe nie. Alle forensiese leidrade sal nou opgevolg word deur die nodige deskundiges en die saak sal deeglik ondersoek word," aldus Pojie. Die uitslag van die nadoodse ondersoek op Hugo was teen druktyd nie bekend nie.

Steyn en Van Rooyen het glo ‘n spoor van verwoesting agtergelaat op hul pad na Jongensfontein.

Foto’s: Wilma Adamson Die huis waar die moord gepleeg is. INLAS: ‘n Bossie blomme op die bordjie voor die huis is stille getuies van die tragedie wat hier afgespeel het.