Gouritsrivier vloei ook
Vir die afgelope 16 maande het die Gouritsrivier geen water binnelands gehad nie. Nou, na goeie reën veral in die Wydersrivier se opvangsgebied, loop die rivier weer.
Die opvangsgebied vir die rivier is sowat 45 000 vierkante kilometer groot, maar die afgelope goeie reën is beperk tot die westelike deel hiervan, oor die Langeberge en Outeniquaberge. In die Rooiberge, ongeveer 25 km oos van Van Wyksdorp en so 15 km suid van Calitzdorp kom die Gamka- en die Olifantsriviere saam om die Gouritsrivier te vorm. Net noord van die kloof wat die skeiding vorm tussen die Langeberge en die Outeniquaberge, sluit die Grootrivier van wes by die Gouritsrivier aan. Stroomaf sluit die Langtouw van noordwes ook aan. Van hier gaan die rivier deur die berge en kom by Die Poort op die kusvlakte aan. Uit die weste sluit nog twee klein riviere, die Wydersrivier en die Valsriver aan. Die Wydersrivier word ook deur twee ander riviere gevoed, naamlik die Witels- en Doringriviere. Volgens plaaslike boere was die rivier ‘diep droog’ en om dit te sien vloei, beteken dat daar baie water ingestroom het. Terwyl die boere en inwoners langs die rivier verheug is oor die huidige toestand, is hulle bekommerd dat die kosbare water in die see gestort word. Daar is al vanaf 1969 planne voorgestel om ‘n dam in die Wydersrivier te bou, maar dit het nooit gerealiseer nie. Baie vertoë is tot in die 1990’s gerig om die dam te bou, maar die soete, kosbare water loop nog die see in. ‘n Opvolgberig oor die geskiedenis van die beplande dam en huidige situasie sal geplaas word sodra met die betrokkenes gesels is. Die foto’s is geneem waar die Valsrivier in die Gouritsrivier uitmond en die gebied word ‘Valsriviermond’ genoem.