Misdaad bedreig almal

RIVERSDAL Baie inwoners is nie daarvan bewus dat die Aalwynfleur-buurtwag elke aand en deur die dag hul buurt deurkruis om sodoende misdaad te help voorkom nie.

Volgens Emor Nel, voormalige Hessequaburgemeester en betrokke by die buurtwag, is dit 'n liefdesdiens, "maar ook ons as inwoners se voorreg om hierdie taak uit te voer." Inwoners word versoek om hul naam op die buurtwaglys te plaas om almal se taak te verlig. Dit kan beteken dat in stede daarvan dat elke lid tans drie opeenvolgende aande per week elke tweede maand moet ry. Dit kan na een aand per week oor ‘n langer tydperk verminder. "Ons is deel van die AfriForum Buurtwagbestel. Dit hou baie voordele in, soos die verkryging van buurtwagmateriaal, ondersteuning in krisistye en baie kundigheid wat die buurtwag baie ondersteun. Ons weet dat misdaad die oplettendheid, paraatheid en deelname van die publiek vereis. Kom ons deel almal in hierdie verantwoordelikheid." Lidmaatskapvorms is beskikbaar by Kerneels Wolfaardt, Huis Wallace Anderson of kontak Nel by 082 459 0889 om jou te besoek. • Die stigting van 'n middedorp buurtwag vind op 22 Februarie om 18.00 by die NG Kerk Moedergemeente kerksaal op Riversdal plaas en almal word genooi om dit by te woon.