Cars help met die versorging van diere
RIVERSDAL "Ons wil nie jou dier van jou af wegvat nie, ons wil mense help om hul dier te kan versorg."
Dit is waarop Sandra Lotz, stigter en voorsitter van die Community Animal Rescue Service (Cars) klem gelê het. "Dit is belangrik vir Cars om vrywilligers te hê wat kan help. Jy hoef nie op die komitee te dien nie. Vrywilligers se hulp sal ingeroep word met fondsinsamelingsprojekte, opnames en sterilisasie dae. Hulle hoef nie 24 uur beskikbaar te wees nie." Vrywilligers wat graag meer wil doen om te help kan as addisionele lid aansluit. Cars is reeds in 2008 gestig en het die hulp van die gemeenskap nodig om van krag tot krag te gaan. Die nie-winsgewende organisasie is afhanklik van skenkers. Die geld word gebruik om katte en honde te steriliseer. Sodra daar meer geld tot Cars se beskikking is kan meer diereliefhebbers opgevoed word. 'n Algemene jaar vergadering is onlangs gehou en daar is weer bespreek wat die doel en vooruitsigte vir Cars is. Nuwe komiteelede is ook gekies. Die bestaande komitee is tans Jaap Kruger (ondervoorsitter), Robyn Learnmonth (tesourier) en Sandra. Nuwe lede wat gekies is, is Mari Stander (addisionele lid) en Erma Franz (sekretaresse). Indien jy by Cars betrokke wil raak of 'n bydrae op enige manier wil lewer, stuur 'n e-pos na: sandralotz@telkomsa.net